Kırda işleyän insannar durumunu hem problemalarını açıkladılar avtonomiyanın kuvetlerina
Bitki yıllar regionda azalȇr meyva başçaları kuraklıın beterinä, ȇksport problemaların hem petrol malların paasın üüselmesinin beterinä. O meyva başçaları da, angıları kaldılar, savaşȇrlar tertiplemää ki insannarın olsun iş erleri. Kongaz küüyün bir kurumun başınnan hem işçilärlän buluştu Gagauziyanın başkanı İrina Vlah. Neylän paylaştılar insannar regionun başınnan, üürendi bizim korespondent.
Kuraklık yıllar getirer ona, ani agrariyalar düşünerlär geçmää eni tehnologiyalara nicä beslemäk tarafından, ölä da eni çiftçilerin ekmesindä. Okadar ki petrol malların paalılanması getirdi ona, ani bu yıl o tehnologiyaları da angıları var, kullanamadılar, zerä pek paalı çıkȇr sulamaa bir ektarı. Var su, ama onu çekmää kıra kurtarmȇr finans tarafından, söledi kurumun başı Grigoriy Sabiyä.
Agrar sektorunda uzmannar nışannȇrlar, ani petrol malların paalılanması getirer ona, ani varkana su sulamaa deyni, onu ökekmesi getirer ona, ani şeftelilerin paası zeedelener bir -iki kat. Erlem büün sulamaa, bir kila tutȇr 3,5 ley. Suladıynan sa 10 ley çıkȇr. Agrar bakanıın başı Andrey Dimitroglo nışannadı, ani bakmadaan kuraklık yıla, şefteli bereketi bu yıl ii, bakmadaan ani kullanmadılar su damnamak sistemasını.
Gagauziyanın başkanı İrina Vlah konuştu çorbacılıın başınnan, da üürendi ne problemalarlan büün karşı gelerlär agrariyalar. Büünkü günä meyva başçasında ilk bereketi sattılar erli panayıra, şindi vererlär Moldovanın meyva suyu yapan kurumnarına 3, 5 leyä.
Meyvaların toplamasında çalışȇr 60 insan, angıları buluştular regionun başınnan. Onnar açıkladılar problemaları, angılarınnan büün karşı gelerlär, urgulayıp ani pensiya hem kazanç parası etişmeer en lääzımnı işlerä.
Regionun başı urguladı, ani devlet kuvetleri lääzım işitsinnär insannarı hem esaba alsınnar en önemli problemeları, bu gaz, paalar hem şafk, çünkü bu kış her bir ayleyä olacek pek zor.
Hep ölä Gagauziyanın başkanı tanıştı büümnerin ikinci grupasının durumunnan. Urgulayacez, ani maasus bu kurumda papşoy hem semışka taa ii nekadar başka kurumnarda. Nicä söledi Grigoriy Sabiya, erlem vakıdında ekärsan hem yaparsan hepsi tehnologiyaları dooru, ozaman kabledecän ii bereket. Baalar şindiki vakıt gösterer kaavi bereketi, ama olmarsa yaamur ozaman üzüm kaliteyä görä olacek diil ii. Ama şindi agrariyalar beklerlär yaamurlararı, angıları var nicä biraz düzeltsinnär durumu çiftçilik bölümündä.
Источник grt.md 20.07.2022