40 yıl sport uurunda. Boris Deçevın eceli.
Komratta regional sport aar atletika okulunda nışannadılar hem kutladılar sport veteranını Boris Deçevı. O 40 yıl verdi bu sportun ilerlemesinä hem evlat boyların terbietmesinä. İlerleder temayı süjetımız.
Aar atletika okulu terbietti çok anılmış sportçuları. Ama etişmää sportun en üüsek basamaklarına trenersız yok nicä. Aar atletika trenerı Boris Deçev baaladı yaşamasını sportlan hem üürenicilerin terbietmesinnän. Bu yıl Boris Deçev tamannadı 82 yaşını. Bu yortuylan onu kutladılar terbiedenneri . Onnar baaşıştan kaarä verdilar ona gramotayı. Trener getirer aklısına nicä çeketti zanaatlanmaa sportlan . O vakıtlar kolhozda vardı sekţiya, nereyi geldı Boris Deçev da.
BORİS DEÇEV sport veteranı : — «Bän geldim, baktım haliz ştangaya, ama o pek küflüydü. Allelem nemdan bozuldu. Da çekettik ştangayı kullanmaa, sora aldılar başka ştangayı, gireyi. Da bu vakıttan çeketti aar atletika. Sora bän gittim armataya, bän o vakıda kaldırardım 120 kila».
Aramatadan sora sportçular kurdular Komratta komandayı, angısınnan pay aldılar çoyu yarışmaklarında, söleer Boris Deçev, ama ii koşullar zanaatlanmaa sportlan yoktu.
BORİS DEÇEV sport veteranı : — «Biz kurduk burada komandayı, angısı her zaman kaaviydi, o girärdi üç en kaavi komandaların aralarına. Küü sportçuların aralarında her keret ilk erleri kazanardık. Zanaatlanardık türlü maazalarda, yoktu lääzımnı koşullar».
Nicä nışannadı regional aar atletika okulun başı Viktor Mavrodi aar atletıkayı Gagauzıyada kaldırdı üüsek uura Boris Deçev.
VİKTOR MAVRODİ regional aar atletika sport okulun başı : — «O sayılȇr aar atletikanın kurucusu Gagauziyada. Onu lääzım örnek gibi almaa. O çok meraklı işleri annattı kendi yaşamasından, gençlerä ilin yol».
Boris Deçevın terbiedilenneri nışannadılar, ki o yardım etti onnara sevmää sporu hem terbietti onarda ii insannarı, gençlär dä savaşȇrlar olmaa nicä o da etişmää hep öla üüsek uurlara.
«Boris Dmitrieviç bizä deyni hem ana, hem boba. O bizi üüretti nicä kaldırmaa ştangayı. Bän taa 80-ci yıllarda zanaatlanardım aar atletikaylan. Adȇrım ona saalık, ki olsun her keret bizimnän».
«İsteerim bobamıza dilemää saalık, kismet hem hepsi olsun ii».
«Çok saa ol ona, ani büüttü beni zerä bilmeerim ne yoldan bän gideceydim. Bän bu yıl onun yardımınnan başardım magistraturayı».
«Düşünerim, ani herbiri zalda isteer kaldırmaa hep öla üüsek kilaları. Ban isteerim olmaa nica o».
«Boris Dmitrieviç yaptı bu zalı, ki biz burada geçirelim sınışları».
Boris Deçev sport uurunda master, kendi bilgilerini verdi diil sade terbiedennerinä, ama uşaklarına da hem torunnarına, angıları büün zanaatlanȇrlar sportlan. Benim çocuum iki keret sport ustacısıydı, torum Ukrainanın hem Moldovanın sport masterı. Pay aldı Evropa yarışmaklarında 17 yaşınadan. Bizdä herkeret talantlı çocuklar vardı. Biz dileriz Boris Deçeva uzun ömür, ki onun terbiedenneri ilerletsinnar aar atletikayı regionda.
Источник grt.md 19.09.2022