Komrattan gencecik gimnastkalar aldılar iki ilk eri “Renaissance”haklararası yarışmaklarda
Komrat muniţipal sport okulun akrobatika hem gimnastika bölümün terbiedilenneri pay aldılar “Renaissance” modern oyunnarı halklararası yarışmaklarında. Onnar Kişinöv kasabasında geçtilär.
“Renaissance” modern oyunnarı halklararası yarışmaklarında pay aldılar komandalar bütün devlettän. Trenerın Alöna Junenin laflarına görä Komrat sport okulundan yarışmaklarda 11 kişi pay aldı . Kızlar üüsek uurda hazırlandılar bu oluşa da gösterdilär gözäl hem professional programmalarını.
“Biz pay aldık zamandaş oyunnarında yarışmaklarında akrobatika uurunda. Kızlar pay aldılar taa ii, nekadar geçän yarışmaklarında , makar onnarda da kazandılar ilk eri. Ama bu sefer onnar taa üüsek uurda gösterdilär kendilerini. Da bän düşünerim, ani gelän sıra olacek taa ii”, — açıkladı trener Alöna Junä.
Yarışmakların çıkışlarına görä kızlar kazandılar ilk eri “solo-akro” kategoriyasında hem ilk eri “nomer-akro” toplumnarın aralarında.
Bu diil ilk yarışmaklar, neredä akrobatkalar göstererlär üüsek çıkışları. Sportçular meraklanȇrlar bu sport çeşidinnän. Yardım ederlär uşakların üüsek becermeklerindä analar-bobalar da. Uşaklar söleerlär , ani üüsek basamaa etişmää deyni lääzım çok hazırlanmaa.
“Bän zanaatlanȇrım iki yıl , da geldim neetlän olmaa becerikli sportçu hem üürenmää akrobatika elementlerini”.
“Bän bununnan meraklandım, bän bunu beenerim, da yok nicä söleyim, ani bendä vardı fikir brakmaa bu sportu. İsteerim ilerletmää bu uurda hazırlanmayı”.
Komandanın trenerı nışannȇȇr, ani uşaklar büük havezlän gelerlär sekţıyaya da sıradakı taramak — bu diil sade trenerın işi, ama birleşik iş, angısınnı yapȇrlar 3-4 yılın içindä. Konkurslardan sora uşaklar olȇrlar taa esaplı, urguladı trener.
“Pek meraklı gitmää yarışmaklara, tanışmaa eni kollektivlärlän, başka sportçularlan. Bu proţestä meraklı, açan kızlar başka kolektivlardan birerdä denerlär kendilerini eni elementlerdä. Bakȇrlar biri-birinä da üürenerlär”, — söledi Alöna Junä.
Nışannayacez, ani akrobatika hem gimnastika bölümündä zannatlanȇrlar türlü yaşta kızçaazlar, angıları diil bir keret kalktılar şannı pyedestala.
Источник grt.md
