Komratta enidän başladılar ilerletmää kız voleybolunu
Komratta enidän başladılar ilerletmää voleybol sport çeşitini. Kuruldu eni voleybol komandası kızların aralarında. Bu yıl onnar pay aldılar devlet hem başka yarışmaklarında. Sportçular kazandılar bitki yarışmaklarında üçüncü eri. Kasabanın professional komandası plana koydu pay almaa devlet ligasında. Bu iş için kızlar beş keret aftada geçirerlär sınışları. İlin mi kalkmaa pyedestalın üüsek basamaklarına, üürendi Zinaida Kanţır.
KDU “Univer” zalasında hergün kendi sınışlarını geçirer voleybol komandası kızların aralarında. Onnar kararladılar kaldırmaa bu sporu üüsek uura. Büün Komratta yakın 40 kişi gelerlär voleybola oynamaa.
“Bu komanda oyunu da zor ki herbiri düşünsün nicä bütün komanda, annasın biri-birini. Bu diil ölä kolay toplamaa komandayı”, — söleer voleybol trenerı Olga Popoviç.
Voleybol klubu şindän sora pay aldı devlet yarışmaklarında, angıları geçtilär beş günün içindä, kızlar kazandılar beşinci eri. Onnar geçmedilär çempionatın finalına, ama bu verdi onnara stimul işlemää ileri dooru da gelän yıla kazanmaa taa üüsek çıkışları.
“Bu ayırmak turlardı, geçtilär beş gün, oyunnar pek kızgındı. Her gün eni komandalar vardı, eni konkurentlar. Kızlar gösterdilär pek kaavi işi. Biz hazırlandık pek çok bu yarışmaklara. Biz ilk keret pay aldık bu uurda. Da bu bizim yaş kategoriyamız”, -annattı Olga Popoviç.
Sade hergünkü sınışlar hem becerikli trenerlan var nicä etişmää üüsek uura sporta. Komradın komandasının yok taa ofiţial adı, ama forma hem zal neredä hazırlanmaa var, koşullar da bu uurda ii. Voleybolcular isteerlär ki Komrat için hem komandayı bilsinnär bütün devlettä.
“Biz olduk taa toplu biri-birimizlän, çekettik oynamaa nicä komanda, da diil ayırı. Da bu verer bizä ii becermek.”
“Biz başladık oynamaa nicä komanda, oyun oldu taa meraklı, var bizdä bu uurda progress. Lääzım gezmää sınışlara, seslemää trenerı, kaçırmaa hem olmaa komandaylan taa birliktä”.
Türlü regional yarışmaklarında pay alȇr adamnar da. Onnarın trenerı nışannadı, ani kızların komandası var nicä kaavi konkurent olsun başka klublara, erlem sıkı hazırlanarsaydılar.
“Biz topladık komandayı bir aftanın içindä. Biz topladık 10 kişi dä kurduk komandayı. İsteerim kızlara dilemää ii başarları, ko kaavi hazırlansınnar. Ko onnarda olsun istemäk, olmarsa istemäk, olmayacek çıkışlar. Erlem hazırlanarsaydılar sıkı çıkaceklar türlü yarışmaklara taa üüsek uurda, da orada tarayaceklar kendi konkurentlarını”, — söledi voleybol trenerı Vadim Gerçoglo.
Çeçän dinnemäk günnerindä Komrattan komanda pay aldı yarışmaklarda, angıları Çimişliyada geçtilär, kazandılar üçüncü eri. Genç komandaya bu ii çıkış, okadarki bunda onnar durgunmayaceklar da plana koydular çıkmaa adım -adım devletin üüsek ligasına.
Reportör: Z. Kanţır
Video: V. Tabaçuk
Kurgu: A. Toplal
Источник grt.md
