Kasabanın kurumnarı pay aldılar futbol yarışmaklarında
Geçän dinnenmäk günnerindä Komrat stadionunda geçtilär futbol yarışmakları, angılarında pay aldı 6 komanda kasabanın kurumnarından. Kızgın matçların oynamasından ilk eri kazandılar futbolcular Komrat primariyasından. Taa derindän süjetımızda.
Futbol komandaları pay oldular iki gruppaya üçär komanda, geçirdilär ikişär matç . Meydanda duyulardı kızgınnık hem kaavi konkurenţıya. Bakmadaan ona, ani tarışmaklarda pay aldılar futbol sevenneri, futbol meydanda üüsek uurda geçti. Oyuncuların laflarına görä yarışmaklar ii sebep- taa bir keret toplanmaa buluşmaa deyni hem götürmää saalıklı yaşamayı.
“ Geçän yıl pay aldık bölä turnirda, da tutturȇrız hepsi primariyanın ideyalarını sport uurunda. Zerä sport — bu bizim yaşamamız, bu saalıklı yaşamak. Bän 49 yaşındayım, da saa ol Allaha duyȇrım kendimi ii sporta görä”.
“ İsteerim oynamaa Komrat poliţiyası için, pay almaa, çünkü sport bu saalık. Bu yaşamak”.
“ İnsannar taa pozitiv olȇr, birleştirer insannarı, onnar taa ii olȇr. Çok dostlaşȇrsın. Zanaatlanarkana sportlan var nicä olmamaa üsek sportçu, ama ii insan olȇrsın” .
Primariyanın teklifinä kararladık kurmaa komandayı da oynamaa. Türlü zanaatçılar toplandılar , hem ne bizi birleştirer bu futbol hem istemäk taramaa”.
Nicä nışannadı yarışmakların baş davaacısı , futbol regionda ilerleer, da bakarak büünkü komandalara , kim pay alȇr, var nicä sölemää , ani o birleştirer insannarı türlü zanaatta.
VASİLİY SUKMAN yarışmakların baş davaacısı:
“ Lääzım bakmaa ne sport çeşitini büün siirederiz, bu futbol. Futbol her keret ayırılȇr başka çeşitlerdän istemeklän bir komanda öbürünü tarasın, azartlan. Açan oynȇȇrlar çocuklar, angıları çalışȇrlar türlü erlerdä her yıl isteerlär taramaa kendi soperniklerini, da sora bütün yıl aklına getirerlär kendi taramaklarını”
Turnirın açılışında kasabanın primarı Sergey Anastasov şükür etti hepsini kim pay aldı yarışmaklarda hem açıkladı, ani sport ilerleer.
SERGEY ANASTASOV Komrat muniţipiyasının primarı :
“Şükür ederim te onnarı kim hazırlȇȇrlar yarışmakları stadionda, nicä Aleksandr hem başkaları. Futbol en anılmış sport bütün dünnedä, da neylän biz büün burada zanaatlanȇrız, verecek bizä ii çıkışları. Saalıı hem meraklı oyunu. Hepsinä adȇrım tarayasınız, sizä deyni bizdä var ii baaşışlar”.
Источник grt.md
