Tipardan çıktı Stepan Bulgarın aaraştımaklar kiyadı gagauzların Balkannarda göçmesi için
Gagauziya Bilim-Aaraştırmak merkezi tiparladı aaraştırıcı Stepan Bulgarın eni kiyadını “Valentin Moşkovun izlerindän Balkannarda yaşayan gagauzlara 1903 yılda gideräk”(rus dilindä). Komratta kiyadı temsil ettilär prezentaţıyada.
20 yıldan zeedä Stepan Bulgar üürener gagauzların göçmesini Balkannara: Bulgariya, Greţıya hem Makedoniya devletlerinä. Aaraştırmakların konusu — üürenmää onnarın kulturasını hem adetlerini, da annamaa, neylän benzeşerlär ya da ayırılȇrlar 1000 kilometra uzaklıkta bizdän bulunan gagauzlar. Stepan Bulgar dolaştı 25 küüyü, neredä yaşȇrlar gagauzlar.
Avtor yaptı bilim uurunda kahramannıı, neçinki gitti Moşkovun izlerindän Baklannara. Kendi vakıdında Moşkov yazdıydı, nicä yaşardılar gagauzlar bu erlerdä. 120 yıldan sora Stepan Bulgar savaştı taa bir keret geçmää hep o yolu da görmää, ne gördü çok yıl geeri Valentin Moşkov, urguldadı Bilim — Aaraştırmak merkezin uzmanı Diana Nikoglo.
Bu büük iş, angısını yaptı avtor,da olacek faydalı te o insannara hem studentlerä, kim meraklanȇr gagauzların tarihinnän, söledi istoriya üüredicisi Svetlana Romanova.
Kiyadın hazırlaması sürttü çok yıl. Stepan Bulgar aaradı arhivlarda çok material, ki belli etmää, ani Moşkov çok yıl zanaatlanardı gagauzların istoriyasının üürenmesinnän.
Bilim-Aaraştırmak merkezi tiparladı 300 kiyat, angılarını vereceklär avtonomiyanın bibliotekalarına hem muzeylerinä.
Источник grt.md
