«Gelinin çiiz sandıı» adetinä ilk festivali Kirsovo küüyündä geçti.
Kirsovo küüyündä «Gagauzlarda gelinin çiiz sandıı-varlık simvolu» oluş adalı gagauz milli tradiţiyalarına hem gagauz halkın istoriya-kultura unikallıın korumasına. Çiizlik sandıkları patretlerdä ayırı sergidä festivaldä göstertildilär. Onnarı uzmannar dünnenin türlü erlerindän topladılar.
50 sandıktan zeedä Gagauziyanın 16 küüyündän hem kasabasından «Gagauzlarda gelinin çiiz sandıı — varlık simvolu» festivalindä temsil edildi. Genç kızların çiizliinä sandıklar oluşun baş ȇksponatları odılar. Burada vardı nicä görmää odundan mebeli türlü büüklüündä, türlü boyalarda, yıllarda hem resimnerdä.
ANNA STATOVA «Gagauz sofrası» ȇtno-kultura kompleksin başı: -«Biz burayı getirdik 4 sandık. Hem büük sandık 1902-ci yıldan, o 120 yıllık. Bu sandık Kati babudan kalma. O çok erlerdä durdu: içerdä, dışarda, ama bän onu korudum ».
MARİYA ARNAUT Komrat kasabasının yaşayanı :- «Gelin çiizini taa küçüklüündän hazırlaardılar. Başlaardılar yapaa yıkamaa, işlemää, boyamaa».
OLGA PASMAKÇİ Dezgincä küüyün yaşayanı :- «Palası da, döşää da, yastıı da, rubası da».
«Gagauzlarda gelinin çiiz sandıı — varlık simvolu» festivalini avtonomiyada geçirmää fikiri burayı aşırıdan geldi, açan BAM çalışannarı ȇkspediţiyaya Bulgariyaya hem Yunanistana gittilär.
İRİNA KONSTANTİNOVA M.Maruneviç adına GBAM başı : — «Orada muzeylerdä gördük gagauz kızların düün çiizliin sandıklarını – onnar halizdän gagauzların varlıı».
Kiyadı aaraştırmak haberlerinnän hem istoriya, şindi var olan patretlärlän, angısı ölä da adlanȇr «Gagauzlarda gelinin çiiz sandıı — varlık simvolu» hazırladı gagauz istorii, yazıcı hem BAM çalışanı Stepan Bulgar.
STEPAN BULGAR gagauz istorii, yazıcı, M.Maruneviç adına BAM çalışanı : — «Biz savaşȇrız göstermää bizim milletin adetlerini, tradiţiyalarını. Çiizlik sandıı-o gagauz kulturasının en eski simvolların birisi ».
Avtonomiyanın başkanı İrina Vlah şükür etti festivalin kurucularını halkımızın varlıın koruması için.
İRİNA VLAH Gagauziya Başkanı : — «Herbir sandık – o ayırı istoriya, kiminsä gençlii,kısmedi,adeti, angıası asirlärcä verilärdi evlad boylarına».
Çiiz sandıına toplaardılar gelinin rubalarını, sandık üstünä yorgannarı hem yastıkları dizärdilär-buna «üklük» deyärdilär.
«Gagauzlarda gelinin çiiz sandıı — varlık simvolu» seftä geçirilän festivalini kurdular hem geçirdilär kultura Bakannıı hem M.Maruneviç adına BAM.
Источник grt.md
