Komratta Mariya Maruneviçin 85-ci yaşına baalı bilim konferenţiyası geçti
Mariya Maruneviç — gagauz halkının istoriyasının anılmış insanı: bilgiç, ȇtnograf, üüredici, cümnä hem politika aktivisti. Oktäbrinin 25-dä Mariya Vasilyevna nışannayacȇydı 85-ci yıldönümünü, ama eceli başka türlü yazılıymış, 2004-tä onun geçindi. Onu anmaa deyni Komrat Devlet universitetindä «İstoriya ecelleri birlii» bilim — praktik konferenţıyası geçti. Orada bilgiçlär, muzeycilär, üüredicilär hem üürenicilär, anılmış cümnä hem politika aktivistleri, dolay, milli hem halklararası bilgi-kultura temsilcileri pay aldılar.
Gagauziyada Mariya Marunevicin 85-ci yıldönümünü nışannadılar. O anılmış bilgiç, cümnä hem politika aktivistiydi, kurdu hem önderci oldu avtonomiyanın Bilim-aaraştırmak merkezindä, nışannadı kurumun şindiki öndercisi İrina Konstantinova.
«Onun adı durȇr Gagauziyanın hem gagauzologiyanın temelindä. Büün bu insanın adını taşıyȇr Gagauz bilim merkezi. Bu çok önemli bir insan Mariya Maruneviç. O gerçektän şaşılacȇk bir insan. Onu lääzım diveç koymaa gagauzların istoriyasına. O kabletti dooru kararları istoriyamız hem halkımız için», — nışannadı İrina Konstantinova.
Gagauziyanın yaşayannarına deyni Mariya Maruneviç karı olarak gösterdi nicä başarılı olmaa politika uurunda. Kendi çalışkannıınnan o açtı yolu gagauz biliminä hem politikasına, söledi Gagauziyanın Başkanı İrina Vlah.
«Mariya Maruneviç kendi örnäännän gösterdi, nekadar kaavi ruhlu var nicä olsun karı, angısı var nicä başarılı olsun nicä ana, bilgiç, aaraştırıcı hem politikacı», — söledi başkan.
Mariya Marunevicin katkısı Gagauziyanın istoriyasında, gagauz dilin ilerlemesindä hem bilgi sferasında sayısız. Mariya Vasilyevna Maruneviç çok yıl Moldova Devletin Bilim akademiyasında çalıştı. Kişinövdakı İ. Krängȇ adına pedagogika institutunda üüretti. Onun teklifinä görä Komrat Devlet universitetindä istoriya hem jurnalistika zanaatlarını açtılar. 90-cı yıllarda Mariya Vasilyevna katıldı «Gagauz halkı» akıntısına hem yaşamasını baaladı cümnä hem politika işinä. Hep o yıllarda kendisi kurdu «Gagauz karıları» cümnä akıntısını hem gagauz televizionun kurulmasının temelindäydi.
Anılmış bilimci hem politikacı Mariya Vasilyevna Maruneviç 18 yıl geeri geçindi — fevral ayın 15-dä 2004-cü yılda.
Reportör: Marina Topal
Video: Väçeslav Kıssa
Kurgu: Artöm Topal
Источник grt.md
