Moldovada 27 universitet erinä kalacek beş. Bu reformayı tutturmadı Gagauziyanın başkanı
Hükümetin oturuşunda bakıldı proekt, angısı baalı Moldovada universitetlerin birleştirmesinnän. 27 var olan universitedin erinä kalacek beş.
Üüsek üüretmäk kurumnarın reformasına girän studentleri zanaat uurunda üürenmeyi ilerledeceklär, kontrakt paaları hep ölä kalaceklar. Aaraştırmak universitetleri kendi strukturalarını 2023-cü yılın dekabrinin 23-dän koruyaceklar. Reformaya karşı kendi bakışını Gagauziyanın başkanı İrina Vlah açıkladı.
«Söleersiniz, ani isteersiniz gençlerimiz burada kalsınnar üürenmää, ama rus dilindä üüredilän okullarda uşaklara deyni devlet dili lääzımnı uurunda üüredilmeer hem kolaylıklar verilmeerlär. Gagauziyanın liţeylerinä devlet hem ana dilinin-gagauz dilinin üüredilmesinä 6 mln. ley kararlandı vermää, ama hükümet, tutturmadı. Belli ki uşaklar, angıları rus dilindä okulu başarȇrlar, aşırıya gideceklär, devlet onnarın üürenmesini devlet dilindä tutturmȇȇr. Bän bu proekti tutturmȇȇrım», — söledi hükümetin otruşunda İrina Vlah.
Universitetlerin birleşmäk proţesini üüretim ministerlii kaliteli üüretmek olacaanı argumentlan tutturȇr.
«Universitetlerdä üüretmeyä 34 mln. ley vereriz. Bizim üüretmäk kurumnarımız lääzım korupţiyasız hem kaliteli üüredän düşer olsunnar. Bän sayȇrım, ani reforma lääzım olsun», — söledi hükümetin başı Natalya Gavriliţa.
Başkanın laflarına komentariy üüretmäk ministerliin başı Anatoliy Topalȇ yaptı.
«Universitetlerin azaltmak sayısını baktıran reforma proekti cümnä dartışmalarından geçti, da onnarda pay almış insannarın teklifleri bu dokumentä girdilär», — söledi üüretmäk ministerliin başı.
Reforma soruşunu günün listesindän çıkarmaa sade bir kişi — Gagauziyanın Başkanı İrina Vlah sesini verdi.
Источник grt.md 14.07.2022