Başkanın uşak başçaların başlarınnan buluşmasında bakıldı terbiedicilärlän baalı soruş
Gagauziyanın başkanı İrina Vlah geçirdi buluşmayı Avtonomiyanın uşak başçaların öndercilerinnän. Oturuşun süresindä açıklandılar o problemalar, angıları büün var uşak başçalarında.
Soruş, angısı baalı uşak başçalarında terbiedicilerin iş uurunun kalitesinnän, büün pek dikkat kontrol ediler, nışannadı Gagauziyanın Üüretim baş bakannıın başı Natalya Kristeva.
“Üüredicilerin uurundan çekiler bizim uşaklarımızın hazırlık uuru da. Burada bizdä var problema, hem biz bu iş için açıktan annadȇrız. Uşak başçalarında büün işleerlär 185 terbiedici pensiyada. Bizä geldi sade 19 danışmak genç uzmannar için. Bu yıl sa universitetlerdän 31 genç terbiedici çıkacek. Bän diilim duşman pensiyada işleyän insannara, ama biz gençlerä dä yol lääzım verelim”, — söledi Kristeva.
Kongaz küüyünün 4-cü uşak başçasının öndercisi Mariya Buçkova nışannadı, ani onnarın kurumunda işleyennerin 80% — gençlär.
“Bizim yaslamızda var pek çok genç uzman hem sade 2 kişi pensiyada bulunarak işleerlär. Gençlerimiz üüsek uurda bilgili. Zanaatları iki dildä götürerlär. Bän hodulluyum onunnan, ani herbir urok üüsek uurda geçer”, — söledi uşak başçasının öndercisi.
Svetliy küüyünün uşak başçasının 9 terbiedicisindän 4-dü pensioner, ama kurumun öndercilii danışmaa genç uzmannar için alatlamȇȇr.
“Bizim uzmanarımız bütün iş gününü işlämeerlär, onuştan da biz verämeriz danışmaklarımızı genç uzmannar için. Çünkü kanona görä gençlerä bütün iş günü lääzım verilsin”, — açıkladı Svetlıy küüyünün uşak başçasının başı Mariya Gaydarcı.
Gagauziyanın uşak başçalarında büün 817 terbiedici işleer. Onnar 8 bin uşaa yakın üürederlär. Uşakların üüsek uurda üüretmäk için Avtonomiyada lääzımnı koşullar da yapılȇrlar.
“Bitki 7 yılda biz 5 eni uşak başçasını düzdük.Çoyunda remont yapıldı. Herbirindä var hepsi lääzımnı koşullar. Bizim işimiz büün, bekim, görünmeer, ama biz onu annayacez 10-15 yıldan sora. İsteerim, ani siz herzaman ilerleyäsiniz, hem ko bizim uşaklarımız kısmetli olsunnar”, — söledi İrina Vlah.
Gagauziyada büün çalışȇrlar 54 uşak başçası hem 3 uşak başçası- gimnaziya.
Источник grt.md 07.04.2022