Gaydar küüyündä «Evropalı küü» programasına görä giriştiriler soţial proektlar
Gaydar küündä bir sıra proekt «Evropalı küü» programasına görä giriştiriler. Düzmäk işlerini yapȇrlar Kultura evindä hem ilk okulun binasında, neredä plana koyulu açmaa kilim muzeyini hem ustalara deyni odaları. Proektın giriştirilmesini kontrol etti Gagauziya Başkanı İrina Vlah.
Gaydar küüyündä Kultura evindä yapılȇr düzmäk işleri. Enilener sportzal hem kultura merkezinin örtüsü enilener.
«Giriştiriler proekt temel investiţiyalar kanonuna görä erli obyektleri için, donor grantların yardımınnan hem “Evropalı küü” proektinä görä. Finansların bir payı verildi sportzalanın düzmesinä. Sevindirer, ani eni küvetlär giriştirerlär diil sade respublika uurunda kazanmış proektleri, ama avtonomiya bücetindän da verilän paraları da giriştirerlär», — nışannadı Gagauziya düzmäk hem infrastruktura bakanı Oleg Orlioglo.
Başlankı okulun yapısında plana koyuldu açmaa muzey, angısı verecek kolaylık Gaydar küüyünün kulturasını hem istoriyasını korumaa, nişannadı erli nasaatın sekretarı Galina Kapsamun.
“Bizim küü anılȇr kendi kilimnerinnän, var çok kultura zenginnikleri – dermen, geçireriz ustalık derslerini nicä dokumaa kilim, var hepsi kolaylıklar ilerletmää turizm uurunu, adetleri hem kulturayı», — açıkladı Gaydar küüyü sovedin sekretari Galina Kapsamun.
Gaydarın primarı İlya Kiosä urguladı, ani yaşayannar hem küü öndercilii savaşȇrlar çalıştırmaa hepsi proektleri, ki küü irelesin.
«“Evropalı küü” programasına görä taradılmış proekt verdi kolaylık bizä düzmää başlankı okulun eski binasında muzeyi, neredä olacek tualet, duş, hepsi, ne lääzım. Pençerelär hem kapular diiştirilmiş. Umutlanȇrım ani tarayacez proektin ikinci payını da. Olacek bizdä trenajor zalı da», — haberledi İlya Kiosä.
Gaydar küüyünüb kulturasını hem istoriyasını koorumaa — küü yaşayannarın baş daavası.
Avtor: İ. Karaman, video: L. Arfanos, montaj: A. Gerçü
Источник grt.md 25.01.2023