Gagauziyada bu yıl meyva berekedi diil pek üüsek. Kimi kulturalarda pek az
Gagauziyada bütündän gider meyvaların toplaması. Meyva başçalarında toplȇȇrlar erik hem şefteli. Bu yıl bereket, bakarak geçän yıla, taa iisik. Çoyu çiftçi kurumnarında erik may yok. Bizim korespondentımız Zinaida Kanţır üürendi, nicä gider meyvaların toplaması.
Tomay küüyünün çiftçi kurumnarın birindä bu yıl kirez oldu pek az geçän yıla görä, neçinki ilkyazın hava suuktu. Çiftçi kurumun başı Valeriy Yalama haberledi, ani o bütün berekedi sattı 20 leyä erli panayıra. Ama geri çeviremedi harcanmış parayı.
Çorbacılıkta plana koydular toplamaa7-8 ton erik, paalar çekederlär 7 leydän yukarı. Bütün toplanılmış berekedi yollȇȇrlar Rusiyaya. Nicä nışannadıYalama Valeriy, bu yıl pek paalılandı logistika.
Başladılar toplamaa erikleri Komrat kasabasının kurumnarında da. Bu yıl erik berekedi Komrat dolayında sevindirmeer agrariyaları, çünkü ilkyazın hava suuktu. İvan Mardarin çorbacılıında 20 ektar erik, fidannarda kaldı sade 10-15 proţent bereket.
Taa ilerdän kurumda kökledilär bir meyva başçasını, çünkü kuraklık belli etti kendisini fidannarda hem pek ucuz satıldı bıldırkı bereket, urguladı İvan Mardar.
Uzmannarın laflarına görä, diil ii hava koşulları getirdilär ona, ani çoyu kurumnar kaldılar bereketsiz. Nicä söledi çiftçilik bakanı Andrey Dimitroglo, aktual kalȇr ȇksportlan problema. Erlem taa ileri satardılar Baamsız devletlerin birliinä girän devletlerä, şindi durum diişti.
Nicä nışannadı Andrey Dimitroglo, ȇksport probleması pek belli edecek kendisini devletin poyraz tarafında, neredä çok alma başçaları. Gagauziyada taa çok çekerdekli meyvalar da bereketi taa çok satȇrlar erli panayıra, ne da kalȇr geçiriler Ukrainanın poyraz tarafından, ama diil okadar çok, nekadar başka yıllar. Nışannayacez, ani regionda dikili 1200 ektar meyva başçası, onnardan 500 erik.
Источник grt.md
