Gagauziyada baalarları başladılar boozmaa. Nekadar sorumnu kır işi avtonomiyada.
Gagauziyada çekettilär toplamaa üzümneri kırdan. Bu yıl hava koşulları verdi kolaylık çeketmää bu işleri taa ileri. Regionda bütündän dikili yakın 5,5 bin ektar baa, angılarından 3,700 tehnik çeşitindä hem 706 masa çaşitindä. Bizim televizion gruppamız üürendi nesoy bereket bu yıl toplanȇr hem var mı problemalar bu uurda.
230 ektar baa Semön Novakın çiftçi kurumunda işleniler. Sezonda insannar bir gündä dördär ektaradan toplȇȇrlar. Şindi Aligotı üzümünü toplȇrlar, öncä Şardanȇyı. Agronomun Vitaliy Petrovun laflarına görä kuraklıın beterinä, az iş yapıldı baalarlarda, ama o belli etti kendisini tenedä.
VİTALİY PETROV Komrat muniţıpiyasının çiftçi kurumun agronomu : -» Kalitesi bu yıl taa yufka, zerä etişmedi nemnik, üç ay yoktu yaamur. Pandal siirek. Tenä ufak, erlerlän üzüm kuruyȇr. Moldova üzümün toumnarından üzüm ufak, siirek. Bu taraftan var kayıplıımız diil az da».
Petrol malların hem beslemäk materialların paalılanması lääzım belli etsin kendisini üzüzmün paasında, ama bu yıl durum başka. Üzüm çok keredä ucuzladı, da uracek agarariyaların cöbünä,- sölerlär uzmannar.
VİTALİY PETROV Komrat muniţıpiyasının çiftçi kurumun agronomu : — «Bakın, açan hepsi paalılandı üç-dört keret , üzümün paayı da, bakarak geçän yıla dört okadar ucuzladı, 3,5 leyädän. O geçän yıl tutardı 7-8 ley. Bakın, energoresurslar paalılandılar dört keredä üzüm dä bukadar ucuzladı. Toplayacez berekedi dä belli olacek, çıktık mı o paaya, angısını harcadık».
Bütün toplanılmış berekedi yollȇrlar kendi şarap kurumuna. Soruşa alceklar mı başka ekonomika agentlarından üzüm, agronom söledi, ani taa diil belli. Ȇksportun kapanması Rusiyanın panayırına, neriyi yollardılar kendi mallarını şarap kurumnarı, erli şarap yapan kurumnarı var nicä üzüm kabletmesinnär. Zerä bıldırdan var taa satılmadık şarap.
VİTALİY PETROV Komrat muniţıpiyasının çiftçi kurumun agronomu : -«Şindiki zaman panayırlar kapalı, da bän düşünerim, ani çoyu şarap kurumnarı almayaceklar üzüm, yada pek küçük paada. Bu olacek katastrofa onnara deyni.. Bizi ilerdä hepsi bekleer».
Üzümün toplamasında çalışȇrlar taa çok insannar 60 yaşından yukarı, 40 yıl işlerlär kırda. Onnar sölerlär, ani 2000 ley pensiyaya yaşamaa yok nicä, da geler sıra kazanmaa, bakmadan yaşalara. İsteerlär, ki devlet kuvetleri esaba alsınnar onnarı.
Bu yıl üç ay hiç yoktu yaamur, da üzümnerin gelecek yılın berekedi baalı hava koşullarınnan da. Nicä sölerlär agarariyalar, olmarsa yaamur bu güzün, gelän yıla üzüm toplanacek pek az.
VİTALİY PETROV Komrat muniţıpiyasının çiftçi kurumun agronomu: — «Bän düşünerim, ani bereket gelän yıla bu yıl başalayacek olmaa, bekim, diil ölä üüsek, nicä biz isteeriz. Olarsa güz yaamurları, ozaman kabledeciiz berekedi. Ama olmarsa yaamur, ozaman bişey toplayamayacez».
Agronomun, Vitaliy Petrovun laflarına görä, er durum çiftçilik bölümündä diişilmeecek ii tarafa, ozaman sıra gelecek brakmaa diil sade meyva başçalarını, ki satılmȇȇr deyni meyvalar, ama köklemää ballarları da.
Источник grt.md
