Video: GAGAUZİYADA İLERLER ÜZÜMÜN TOPLAMASI
Gagauziyada üzümün toplamak proţesin ikinci ȇtapı başladı, toplȇȇrlar tehnik çeşitlerini, onnarı yollȇȇrlar şarap kurumnarına. Taa çoyu kurumnarında var kendi baaları. Bizim televizion gruppamız bulundu Kirsovo küüyün kırlarında.
Bu yıl Kirsovo küüyün kurumunda üzümneri taa geç çekettilär toplamaa. Bu çiftçilik kurumnarında masa hem tehnik çeşitlerini büüderlär. Nicä nışannadılar uzmannar, bu yıl paa pek küçük. Bu üzerä “Arkadiya” üzümü aşırıya satılmadı, onu erli şarap kurumnarına verdilär, ki şarap yapsınnar. Bu yıl geçmiş yıla görä üzüm bereketi taa üsek, ama rekordları geçmeyecek, çünkü 2020 yılın kuraklıı belli etti kendisini çotuklarda.
Yaamurların beterinä baaları taa sık bu yıl hastalıklardan lääzımdı korumaa. Vakıtçasına yapılmış hepsi korunmak işleri verdilär kolaylık kabletmää ii bereket, söleerlär çorbacılıın uzmannarı. Onnar umutlanȇrlar, ani hava koşullarına görä bereket gelän yıla da ii olacȇk. Pandallar büük hem şeker da ölçülerä görä var.
Yıl zordu, ama koyduk kuvedimizi, yaadı yaamurlar, serptik vakıtçasına. Kultivaţıya yapıldı. Şindi berekedi toplȇȇrız. Yıl zordu, ama hepsini yapȇrız ki vakıtçasına onu toplamaa. Bakarak geçän yıla bu yıl bereket taa ii.
Kurumda var hepsi lääzımnı tehnika tedarıkları, ki işleri yapmaa vakıtçasına hem hava tutarkana toplamaa bereketi. Ama toplamak vakıdı uzunnayacȇk, çünkü etişmeer insan kırda işlemää deyni. Taa çok büük yaşta insannar çalışȇrlar. Kurumun mehanizatoru söledi, ani kırda iş koşulları ii, ama gençlär yok.
“Pek az genç insan işleer kırda, bizim kollektivdan insannar büük yaşta. Kazanç parası bekim büün ii, ama zor işlemää kırda. Hepsi aarȇrlar taa kolay iş”.
Çalışȇrlar kırda insannar Kirsova küündän hem bir brigada Baurçudan. Onnar nışannadılar, ani çoktan işleerlär kırda, pensiyadaykan bu ii kazanç. İşlemää zor, ama meraklı, açan bereket dä sevindirer hem kazanç parasını vakıtçasına vererlär.
“En zor iş kırda, hepsi biler. Büünkü günä toplȇȇrız Rekaţeteli çeşitini. Üzüm bu yıl ii. Çok ot var, işleniler neredä zor, neredä kolay”.
“Şükür Allaha, ani bölä bereket var”.
Çiftçi bakannıın uzmannarın haberlerinä görä Gagauziyada üzümün orta bereketi kurȇr yakın 8 ton ektardan. Paa politikası bu yıl tehnik çeşitlerinä beş leydän yukarı. Regionda dikili 5bin 380 ektar baa.
Источник grt.md 12.10.2021