Çadırdakı M. Guboglu adına liţeyin hepsi klaslardan üürenicilär “Ana dilimiz” yortusuna baalı açık dersi hazırladılar
Çadır kasabasının M. Guboglu adına lițeyindä geçti açık ders. Literatura-muzika olayı baalıydı «Ana dilimiz» yortusuna, angısını avtonomiyada nışannayaceklar çiçek ayın 27-ndä, hem gagauz yazıcısının Dionis Tanasoglunun 100-ncü yoldönümünä.
Çadır kasabasının Guboglu adına lițeyin 1 — 11 klaslardan üürenicilär açık urokta aktiv pay aldılar. Onnar gösterdilär muzika kompozițiyalarını gagauz dilindä, okudular şiir, annattılar şannı gagauz yazıcıları için hem kultura insannarı için.
“Bu yortuya hazırlandık 1 ay. Türküleri, şiirleri ürendik, kendimiz hazırladık bu yortuyu. Uşakların kalbinä yakın bu yortular. İsteerlär pay almaa, getirerlär eksponatları. Bizim liţeyimizdä uşaklar lafederlär gagauz dilindä”, — söledi üürenicilerin biri.
“Bizim şkolamızda geçti D. Tanasoglu için urok. Biz üürendik onun için çok. Ne o yaptı gagauz halkı için. Gösterdik onun çalışmasını. O yok, ama biz ilerlederiz onun çalışmasını. Onun adı bizä deyni onemli”, — açıkladı taa bir üürenici.
“Bu dil bizim ana dilimiz. Biz yaşȇrız Bucak tarafında. Lääzım sayalım gagauz adetlerini”, — paylaştı taa bir liţeyci.
Gagauz adetlerin hem kulturanın ilerlemesi birleştirer, nışannadı Gagauziyanın Başkanı İrina Vlah.
«Bizim dilimiz şıralı. Hepsi insannar, kim yaşȇȇr Gagauziyada, lafedeceklär gözäl bu dildä. Şükür ederim, ani katıldık bu olaya hem gördük, nicä gözäl onnar lafederlär», — söledi Başkan.
Gagauz dilini uşaklar üürenerlär, kullanarak bu bilgileri başka derslerdä dä, nışannadı gagauz dili hem literatura üüredicisi Oksana Konstantinova.
“Bu yıl bizim yortumuz baaşlanıldı D. N. Tanasogluya, onun yıldönümünä. Gösterdik onun yaradıcılık yolunu. O bir apostol dil tarafından, ondan başladı teatr, “Kadınca”. O kultuta hem dil uurlarında çok yaptı. Hatır göstereriz ona. Hem göstereriz onun yaradıcılıını her taraftan”, — nışannadı üüredici.
Liţeydä var muzey, angısını uşaklar barabar üüredicilärlän yıl-yıldan zenginnederlär. Bölä onnar taa derin üürenerlär gagauz halkın istoriyasını, kulturasın hem dilini.
Источник grt.md
