Komratta geçti buluşmak gagauz yazıcısınnan, etnograflan hem folkloristlän Mariya Durbayloylan
Gagauz folklorun aarştırması hem koruması, gagauz türkülerin, maanilerin hem masalların toplaması. Bu iş için laf gitti buluşmakta yazıcıylan, etnograflan hem folkloristlän Mariya Durbayloylan. Komrat kasabasının türk bibliotekasında toplandılar onun kolegaları, dostları, üüredicilär hem studentlär, onnar, kim taa yakından istedi tanışmaa Mariya Durbaylonun yaradıcılıınnan.
Mariya Durbaylo taa çok biliner nicä Mariya Kuyumcu. Bölä adlan çıktı birkaç onun annatması hem şiiri. Bunu için annattı bibliotekanın başı Vasilisa Tanasoglo tanıştırarkana pay alannarı Mariya Angelovnanın biografiyasınnan.
Mariya Durbaylo duudu hem büüdü Tomay küüyündä, neredä büün da yaşȇȇr. Orada o yazȇr, yaradȇr, hem aaraştırmalarını yapȇr. O umutlaner çıkarmaa taa bir kiyat gagauz masallarınnan, angılarını o topladı, yazdı, ama taa tiparlamadı.
Söleyip Mariya Durbaylonun işleri için, anılmış bilimci, yazıcı Stepan Bulgar nışannadı, ani onun zaameti pek büük. Da onu yıllar geçince belli etiilär.
Neredä da çalışmasın Mariya Dfurbaylo, o herzaman folkloru aaraştırardı, üürenärdi, neçin taa küçüktän bu iş onu meraklandırardı. Gelip Moldovanın bilim akademiyasına işlemää, Mariya Angelovnada şansora vardı folklor materialı, aklına getirer Pötr Çebotar. O söler, ani Mariya Durbaylo var nasıl olsun hepsinä örnek, nicä büüklerä ölä genç olannara da. O gösterer büük sevgiyi kendi halkına, istoriyasına, kulturasına hem adetlerinä.
Mariya Angelovna Durbayloyu var nasıl koymaa bir sıraya Mariya Maruneviçlän. O haliz gagauz halkın bir kızı. Gagauziyada var kiminnän hodullanmaa hem kimdän örnek almaa. Bölä çıkışa geldilär buluşmanın pay alannarı.
Источник grt.md
