COVID-19-dan geçinmiş doktoru Födor Barganı hem başka medikleri andılar voleyvbol turnirınnan
Komratta geçmiş dinnenmäk günnerindä geçti voleybol turnirı neetlän anmaa infekţionist doktorunu Födor Barganı hem başka medik uzmanarını, kim verdi canını güreşärkänä COVID-19 pandemiyasınnan. Yarışmaklarda pay aldı dört komanda Komrattan, Tomaydan hem Kauldan.
İnfekţionist doktorunu Födor Barganı hem başka COVID — 19 — dan geçinmiş doktorları anmak turnirı adına, geçti gençlık hem sport bakanıın sport zalında. Açılışta çok laf sölendi o doctorlar için, angıları şindän sora yanımızda yok. Onnar ömürünü verdilär kurtararkana başka insannarı COVID — 19 hastalıından. Födor Bargan Komrat poliklinikasında işledi. Onun karısı Lübov Bargan nışannadı, ani o sevärdi kendi zanaatını, ama sportlan da aktiv zanaatlanardı.
“Halizdän Födor Dmitrieviç pek sevärdi sportu, da voleybol o diil bir sport soyu, angısınnan o zanaatlanardı. Taa okuldan o ii oynardı futbol, universitettä da oynardı. Sora bizdä baş tema oldu voleybol. Da kendi sevgisinnän sporta o ulaştırardı onunan hepsini, kim yanında bulunardı”, — söledi Födor Barganın karısı Lübov Bargan.
Serbest vakıdında 20 yıldan zeedä Födor Bargan gelärdi zala, neredä geçirärdi sınışları dostlarınnan türlü sport çeşitlerindä, ama en pek sevärdi voleybolu.
Komandaların aralarında oyunnar kızgındı hem meraklıydı, çünkü pay aldılar nicä gençlär, ölä da veterannar. Vardı kimdän üürenmää hem becermek almaa. Kimsey istemäzdi kalmaa aşaa.
Çoyu onnardan, kim pay aldı yarışmaklarda, bilärdilär Födor Barganı ya da dostluk edärdilär onnan, çünkü çok yıllar barabar gelärdilär zala hem pay alardılar yarışmaklarda.
“Biz bir büük ayläyiz, angısı kurulu dostlardan, kollegalardan. Çok vakıt biz geçirdik bilä iştä. Taa çok iştä nekadar serbest vakıdında. Da bu turnir topladı hepsini, ki anmaa insannarı, angıları geçindilär güreşärkana bu infekţıyaylan”, — söledi Födor Barganın dostu hem iş ortaa Vitaliy Mavrodi.
Hepsi buluşmakları oynadıynan erlär pay oldular puannara görä butakım: ilk eri Kauldan voleybolcular kazandılar, ikinci erdä Medik komandası Komrattan, üçüncü erdä Tomay komandası. Pay alannar kararladılar baaşlanmış onnara paraları koymaa doktorları anmak sofrasına.
Источник grt.md 01.06.2022