Çadırda Türkiyenin 2016-cı yılın 15 Temmuz şehitlerinä saygı
Gagauziyanın Çadır kasabasında, Türkiye Respublikasının “Demokratiya hem Milli Birlik Günü”n 6-cı yıldönümü çerçevesindä, 2022-ci yılın Orak ayın (iyül) 16-da Türkiyenin 2016-cı yılın 15 Temmuz şehitlerin anmasının saygı sırası oldu, angısı yapıldı Çadır kasabasının primariyasının kararınnan hem Türkiye Türk İşbirlii hem Koordinaţiya Agenstvosu Başkannıın (TİKA) yardımınnan bu kasabnın“İzmit kardaşlık parkında” kurunan 15 Temmuz şehitlerinä anmak nışan taşı yanında.
Sıra başladı 2016-cı yılın 15 Temmuz (Orak ayın (iyül) 15-şi) gecesi FETÖ tarafından Türkiyedä devlet devrimi denemesinä karşı koyan 251 şehiti hem yaralannan insannara saygı duruşundan, nedän sora 15 Temmuz şehitlerini anmak nışan taşına çiçeklär koyldu. Çiçek koyma sırasında, başta Türkiye Kişinev Büükelçisi Gürol SÖKMENSÜER olarak, pay aldılar Türkiye Kişinev Büükeçiliin diplomatları, Türkiye Respublikasının Gagauziya Komrat Başkonsulu Hasan AKDOĞAN hem Başkonsulluun zaametçiileri, Gagauziya Başkankası İrina VLAH hem Gagauziya Halk Topluşu Başı Dimitriy KONSTANTİNOV, TİKA Kişinev programaların Koordinatoru Selda ÖZDENOĞLU hem TİKA ofisin işçileri, Gagauziya Halk Topluşun deputatları hem Gagauziya İspolkomun azaları, Çadır rayon administrațiyasının öndercileri, Gagauziyada çalışan Türk üüredicileri hem iş adamnarı, sıradan insannar.
Olaylan ilgili nasaatlar sırasını açtı Türkiye Kişinev Büükelçisi Gürol SÖKMENSÜER, angısı candan-ürektän annattı o altı yıl geeri olan FETÖ tarafından Türkiyedä devlet devrimi denemesi için hem Türkiye halkının bu denemeyä karşı koymasını, hem da saygıylan andı devrimcilerä karşı koyan 251 şehiti hem iki bindän zeedä yaralanı.
Ardından nasaat etmeyä çıkan Gagauziya Başkankası İrina VLAH, yarı gagauzça yarı Türkye türkçesindä, zar-zor okudu onu, ne Canabisinä yazmıştılar bir kiyatta onun yardımcıları bu önemni gün için.
Sırada mikrifona çıkan Gagauziya Halk Topluşu Başı Dimitriy KONSTANTİNOV, bir kiyatsız, can duygularınnan nasaat etti o 2016-cı yılın Orak ayın (iyül) 15-şi gecesi Türkiyedä olan işlär için, urgulayıp bu FETÖ tarafından Türkiyedä devlet devrimi denemesinin durgutması için Türkiye halkın hem Türkiye Respublikasının Prezidentı Recep Tayyip ERDOĞANın büük rolünü.
Anmak sırasında resim sergisi kuruldu hem bir pomana masası yapıldı.
Источник anasozu.com
