TİKAnın yardımınnan 23 multää gagauzça dubläj yapıldı
Türk İşbirlii hem Koordinațiya Agenstvosu (TİKA) Başkanı Serkan KAYALAR kendisinin twitindä bildirdi, ani TİKAnın Proektınnan dünnääyın 23 meltiinä gagauzça dubläj başarıldı hem gagauz uşaklarına baaşlandı. Bu gözäl hem pek lääzımnı Proekt yapıldı o üzerä, ani rus dili ortamında bulunan gagauz uşaklarını hem büüklerini dä gagauz dilinä yaklaştırmaa hem, multiklär meraklıınnan, ana dillerinä döndürmää.
Maasuz “Ana Sözü” redakțiyamıza deyni TİKA Kişinev programaların Koordinatoru Selda ÖZDENOĞLU proekt için bölä bilgieri verdi: “Bu proektı Gagauziya Radio hem Televideniyası Cümne Kompaniyasının adından hazırladı Vera SİBOVA, angısı becerdi gözäl bir ekip toplamaa hem, içindä Türkiye yapımı da olan, 23 multiin gagauzçaya dubläjını yapmaa. Bu multiklerin toplam uzunnuu yaklaşık 500 minut”.
Belli ki, bu büük proektın bölä kısa vakıtta en üüsek uurda başarılmasını becerdikleri için biz meraklandık proektın öndercesindän Vera SİBOVAdan. Canabisi, sadecä ona yakışar inceliklän açıkladı: “Bu Proekt halizdän benim fikirim, ama, annayın, bän onu tek başıma yapmadım hem yapamayaceydım da. Biz onu başlattık 2021-ci yılın Çiçek (aprel) ayında da yıl sonuna kadar, 8 ayın içindä, başardık. Proekt için yaklaşık 30 kişilik bir bölük kuruldu. Onun içindä, tehnik personalından kaarä, vardılar Gagauziyanın anılmış artistleri, türkücüleri, Çadır teatrusunun aktörları, şkola üürencileri, kultura izmetçileri hem başkaları. Siz düşünün, 23 multik deeriz, ama onnarın çoyu seriallar, onuştan bu 23 multiin içindä 75 ayırı bölüm var. Onnarın hepsinin personajların harakterları da ayırı. O harakterları göstermää lääzımdı”.
Okuycuklarımıza deyni bildireriz, ani bu Proektın yardımınnan gagauzçaya dubläj yapılan multiklerin arasında var bölä anılmış multiklär – “Ayıcıklar”, “Çeburaşka”, “Fiksiklär”, “İki kedicik”, “Piliççik”, “Şımarık aylä”, “Umka”.
Hepsi bu multiklerä, gagauzçaya dubläjdan kaarä, romıncaya subtitrirovaniya da yapıldı.
Proektın ofițial açılış sırasından sora, bütün kontent Gagauziya Radio hem Televideniyası Cümne Kompaniyasına verilecek hem, umut ederiz, ani durmamayca hem hergün bu Kompaniyanın efir dalgalarında avşam-sabaa yayınnanacek.
PATRETLERDÄ: Vera SİBOVA, Tatyana KOLTUKLU, Andrey PALİK hem küçük artist Nikita KOLİOGLU.
Источник anasozu.com 11.01.2022