Diil hepsi açılacek: Gagauziyada angı dinnenmäk lagerleri kabledeceklär uşakları bu yazın?
Gagauziyada uşaklar için birkaç dinnenmek lageri var. Pandemiya beterinä iki yıl onnar kapalıydılar. Angı lagerlär bu yazın hazır kabletmää uşakları dinnenmeyä hem ne günü açılkaceklar, Zinaida Efremova.
Yaz – uşak lagerlerin vakıdı, neredä üürenicilär dinnenmäk yaz vakıdını var nicä ii uurda geçirsinnär. Bu yıl Kirsova küüyun dinnenmek bazası plannȇr açılmaa orak (iyul) ayında, haberledi yaşamak punktun başı Sergey Sapunjı. Ama hep o vakıt da kahırlanȇr, ani bu iş var nicä olmasın, çünkü paalar kalktılar üüsek uura hem da koşullar da lääzım uysunnar zamandaş standartlara görä.
“Plana koyduk açmaa lageri orak ayında, ama paalar taa diil belli. Bizdä çalışȇrlar ii uzmannar, hepsi hazırlanȇr. Sanȇrım, ani uşaklar beneceklär. Onnarı çok meraklı olay bekler”, — açıkladı Sergey Sapunjı.
Bilinmeer taa açılacek mı bu yıl Kongaz küüyun lagerı «Kostör». Hem da Kazayak küüyün lagerı «Olimpiya» kapandı düzmäk işleri geçirmesi için, da uşakları kabletmeyecek. Çadır kasabasının da lageri kalȇr kapalı, neçinki düzülsün lääzım, ama kuvetlerä aarȇrlar kolaylıı çözmää bu soruşu, nışannadı muniţipiyanın başı Anatoliy Topal.
“Bu bina kaldı ilerki vakıttan, kötü durumda. Var kiyatlar onun düzülmesi için, ama taa para bulunmadı. Biz isteriz vermää uşakları başka lagerlerä, ödeyip transportu. Var burada bir lager, onun çorbacısı tezdä geler, da savaşacez annaşmaa onunnan, deyni uşaklar olsun neredä dinnensinnär”, -açıkladı Anatoliy Topal.
Bu yıl hazır kabletmää uşakları Komrattakı regional lageri «Olimpieţ», angısı başlayacek çalışmaa orak ayın birindän, haberledi gençlik hem sport bakannın başı Sergey Stoyanoglo.
“İslää, ani şansora hiç bir yok durgutmaklar var, ama infrastrukturayı lääzım illerletmää.Umutlanȇrız, ani açılacez orak ayında. Alarak esaba eni nasaatları Hükümettän, paalar da kalktılar, da 620 ley edecek 10 gün. Lager hazır kabletmää 150 uşak”, — açıkladı gençlik hem sport bakannın başı.
Pandemiyanın vakıdında lagerlär işlämedilär nicä lääzım. Şindi da paalar kalkmasından sora başka kösteklär peydalanȇrlar. Taa ileri lagerä uşaa yollamaa edärdi 300 leydän zeedä, şindi sa var nicä etişsin 600 leydan zeedä.
Источник grt.md
