Bilim-aaraştırma merkezi hem yatırım agenstvosu Bakannık Komitetin strukturasından çıkarıldılar
Êksport hem investiţiyalar için agenstvosu hem Mariya Maruneviç adına Bilim — Aaraştırmak merkezini çıkarıldılar Bakannık komitetinin strukturasından. Gagauzia Halk Topluşun deputatları kablettilär diişilmekleri Bakannık komiteti için kanonuna. Bu Kanon kabledildiydi 1998-ci yılda orak ayın 9-da. Diişilmeklerin baş neeti — uydurmaa bu kanonu Gagauziyanın baş kanonuna – Ulojeniye-ya. Taa bir enilik, ani yazıldı bu kanona – Gagauziya Bakanık komitetin azaları lääzım gagauzça bilsinnär.
Bakarak GHT içindeki reglamentına, 67-ci bölümünä, deputatların var hakı bir oturuşta 2 okumakta kabletmää kanonnarı. Nicä nışannadı Mihail Jelezoglo, “Bakannık komiteti için” kanonunda belli edildi, ne lääzım bilsinnär hem becersinnär Bakannık komitetin azaları. Deputatlar nışannadılar, ani hepsi üüsek öndercilär lääzım bilsinnär gagauz dilini.
MİHAİL JELEZOGLO, GHT deputatı: “Biz zor lafederiz, bilmeeriz, ama bukadar da lafetmäärsadık, ozaman 5-10 yıldan sora dilimiz heptän kayıp edilecek”.
Kendi bakışını diişilmeklär için açıkladı GHT deputatı Demyan Karaseni.
DEMYAN KARASENİ, GHT deputatı: “ Biz gagauz dilinä sade aardılarsaydık, ozaman ayıracȇz ii lafedenneri, ama becermeksiz uzmannar olacȇklar, bilmeyeceklär ne lääzım bakannıklarda yapsınnar”.
DMİTRİY KONSTANTİNOV, GHT başı: “Büün gördük ne uurda ilerleer gagauz dili, hem kanon kabledildi 2018-ci yılda, geliştirilsin lääzımdı 2021-dä”.
Gagauziyanın Bakannık komitetin önercisinin yardımcısı Olesä Tanasoglo nışannadı, ani avtonomiyada lääzım olsun önemli koşullar, ki kuvettä bulunan insannar gagauz dilini üürensinnär.
OLESÄ TANASOGLO, Bakannık komitetin başın yardımcısı: “Bän açan üürendim okulda, ozamannar yoktu kolaylık üüsek uurda üürenmää gagauz dilini. Büünkü gündä kısa zamanda kurduk Bilim – Aaraştırma Merkezinnän barabar türlü metodika materiallarını, onnar var herbir ayledä, hem uşak başçaları onnarın yardımınnan üürederlär uşakları gagauz dilinä”.
Dartışmaklar halk topluşun oturuşunda vardı başka diişilmeklär için dä. Teklif edildi vermää BAM özel baamsız statusunu. Taa çoyu deputatlar verdilär seslerini çıkarılsın investiţiya agenstvosu hem Bilim-Aaraştırmak merkezi Bakannık komitetindän. Toplantı süresindä Georgiy Leyçu nışannadı, ani gözledilmeer neet indirmää yada yok etmää bu bölümneri, ama kaldırmaa onnarın uurunu.
GEORGİY LEYÇU, GHT öndercisinin yardımcısı: «Birerdä yok, elbetki bizim baş kanonumuzda da yok investiţiyalar agenstvosunun direktoru hem Bilim-Aaraştırmak merkezin öndercisi, biz kanona bununan karşı koyêrız, o üzerä burada da açıklanêr, ani almaa bu merkezleri ayırı bakannık komitetindän olsunnar».
Deputatlar, alarak esaba BAM uzmannarın bakışlarını hem tekliflerini, düşündülär kurmaa ayırı kanonu, angısında bakılacek BAM iş uuru.
Источник grt.md
