Yaşayannar Kişinövda mitinga çıktılar
Dinnenmäk günnerindä MD baş kasabasında geçti miting, angısında yaşayannar açıkladılar kendi diil kayıllıını energetika durumunnan devlettä. Miting toplandı ŞOR partiyanın temsilcilerininnän.
6 buçuk bin insandan zeedä, devletin herbir tarafından toplandılar Kişinövda kendi bakışlarını energetika durumu için açıklamaa.Paaların üüselmesi büün dalgalandırȇr herbir yaşayanı.
PAVEL VEREJANU Orhey kasabasının primarı : — “Biz göreriz, ani gazın paası bitki yılda zeedelendi 5 kereyä, 3 kereyä dä paalılandı şavk. Biz göreriz nesoy paalılanȇr ekmek. Biz göreriz, ani Hukumet yapȇr hepsini, ani insan aaçlktan ölmää başlasın”.
Mitingta pay aldılar devletin hem yaşlı yaşayannarı, hem hençlär.
KRİSTİAN BOTNARENKO : — “Sevinerim, ani burada çok genç var. Hepsi onnar isteerlär diyşilmekleri devletimizdä ii tarafa. Gençlerin en büük probleması o, ani onnar kazanmaa deyni başka devletlerä çıkȇrlar. Gençlär tutturdular kuvettä bulunan partiyayı seçimnerdä, ama pek tez annadılar, ani yanıldılar”.
Kuvettä bulunan partiyanın deputatı Oazu Nantoy nışannadı, ani bu mitinglardan birisi tarayamayacek.
OAZU NANTOY MD Parlament deputatı : — “Bän tä nesoy notalȇȇrım bu mitingleri. İnternet büün dolu türlü gübürlüklärlän, angılarında teklif ederler kuvetleri bastırmaa. Bu ama diil plüralizm, ama politika haydutluu. Bileräk, ani onnara bişey olmayacek, onnar adımnäärlar hepsi kırmızı çizgileri. Kuvetleri bastırmak teklifleri MD 342-ci statyasına görä zapedili. Bän bilmeerim bir da insan, angısı büün kayıl paaların zeedelenmesininnän, ama bu akţiyalarda açıklanan fikirlär sade dalgalandırȇrlar politika durumunu devlettä, bundan hiç bir taraf ta taramayacek”.
Politolog İgor Boţan sayȇr, ani bu mitinglärlän Şor partiyası başladı eni seçimnerä hazırlanmaa.
İGOR BOŢAN politolog : — “Şor partiyasına deyni, bu mitin var nicä pozitiv diyşilmeklerä getirsin. Büün şansora başladı hazırlanmak seçimnerä. Bir yıldan sora geçeceklär erli seçimnär, taa bir yıldan sora prezident seçimneri hem sora da parlament seçimneri. Onuştan bu mitinglar yardım ederlär tutturmaa partiyanın özünü”.
Mitingın pay alannarı parlamentin önündä palatkaları koyup, açıkladılar ani akţiya sonsuzlaadan uzanacek.
Источник grt.md
