“Yakında mumnara dönecez”. Yaşayannar şafkın paalılanması için
Energiyayı kontrol edän milli agenstvosu kaldırdı şafkın paasını. Premier Energy kurumu kirez ayın 1-dän insana 22 % taa paalı energiyayı satȇr — 2 leyä 64 banä. Kurum yolladı insannara kiyat, neredä nasaat verdi nicä çok harcamamaa hem arttırmaa energiyayı. Ama yaşayannar nışannȇȇrlar, ani çoktan bu işi yapȇrlar, çünkü şafkın paası dayma üüseler.
Şafkın paalılanmasının beterinä vatandaşlar taa zeedä para aylä bücetindän harcayacȇklar, nışannȇȇrlar avtonomiyanın yaşayannarı. Pensiyada insannara deyni o ödemeklär büük problema.
«Pek prost. Bän pensiyadayım 40 yıllık stajlan. Pensiyam sade 300 leyä zeedlendi. Şindi taman gaz için ödedim 250 ley, kışa ne yapacam? Şafk ta 150 ley gelmiş. Bana deyni o pek çok».
«Hiç sevinmeerim o paalara. Onnarı kaldırȇrlar, ama insan için kimsey düşünmeer. Nicä var nicä bir pensyaya yaşamaa. İlerdän 110 ley ödärdim, şindi gelmiş 400 ley».
«Ani paalar kalktı o pek prost. Öderlär iştä az. Kazanç paramız sade harçlara gider. Prost edin, ama yok neylän bir parça sucuk ta alalım».
«Pek prost hem gaz hem dä şafk kalktı. Nicä yaşayacez. 400 ley şafk geldi. İkimiz däduylan yaşȇȇrız. Neredän okadar para alalım».
İnsan savaşȇr arttırmaa. Zeedä elektrik tedarlıklarını kullanmȇrlar hem almȇȇrlar. İnsannarın çoyu çizgiledi, ani az kullanȇrlar, ama hep okadar ayın bitkisindä hep o parayı öderlär.
«Nicä arttırmaa? Sade televizoru koşȇrız. Mikrodalga fırını imeyi yısıtmaa deyni koyalım lääzım. İkanmaa lääzım. İmä yapmaa lääzım».
«Belli ki, savaşȇrım taa az şafkı kullanmaa. Evdän çıktıynan herbir işi sündürerim. Geçecez geeri mumlara».
«Nicä taa az şafk kullanmaa. Herbir içerdä sündüreriz. Evdä sade televizor hem buz dolabı işleer,ama hep okadar çok geler ödemää».
Energiyayi verän kurumun pressa sekretari Vasiliy Grebença sayȇr, ani şafkın paası lääzımdı kalksın, zerä kurumnar artık taa paalı energiyayı satın alȇrlar. O nasaat etti insan arttırsın energiyayı, bu tek kolaylık taa az ödemää, söledi o.
«İnsan istärsä taa az ödemää lääzım olacȇk taa az onu kullansın. Bu taraftan yaklaştıynan energiyanın korumasına olacȇk taa kolay energiya verän kurumuna hem insana vakıdında ödemää. Bölä tarayacȇk hepsi. Borçlar toplanmayacȇklar. Energiya verän kurum da taa eterli insana onu verecek», — açıkladı ȇnergiyayi verän kurumun pressa sekretari.
Devlettä şafkın paasını bir sıra çiçek ayında üüselttilär 44 %. Ama şindi kirez ayın 1-dän paa kaltı taa 22%, da kurdu 2 ley 64 bani 1 kVt için saatta.
Источник grt.md 14.06.2022