Video: “ÜÜREDİCİ ETMEER, AMA BİZ İLERİ GİDERİZ”
Üüredici zanaatı çeker insandan pek çok kuvet. Bu zanaata kendilerini verän insannarın etmemezlii duyulȇr Gagauziyanın üüretim kurumnarında, annattı Gagauziyanın üüretmäk Baş bakannıın başı Natalyä Kristeva.
Gagauziyanın üüretmäk uurunda, 46 üürenmäk kurumunda 16 bin üürenici büün var. Onnarlan 3 bin üüredici işleerlär. Ama onnarın sayısı etmeer.
«Bukadar uşak üüretmää deyni bizä çok üüredici dä lääzım. Geneldän bizdä 3000 üüredici var. Hepsi onnar bizim uşaklarımızı iilää, gözellää, ariflää üürederlär», — söledi Kristeva.
Natalyä Kristeva nışannadı, ani nicä dä her zaman, büün dä üüretmäk uurunda duyulȇr uzmannarın etmemezlii.
«Bakmayarak buna, biz herbir şkolada herbir disţiplinaya üüretmää savaşȇrız», — nışannadı üüretim bakannıın başı.
Bu problemayı yoketmää deyni her yıl Gagauziyanın şkolalarına genç üüredicileri beklerlär. Bu yıl 32 genç üüredici kendini üüredicilää baaladılar.
«Bizä etmeer üüredici matematikada, fizikada hem başka disţiplinalarda. Bu disţiplinaları okuyan üüredicilerin taa çoyu büük yaşta insannar, onuştan biz savaşȇrız gençleri bu ura çekmää», — açıkladı Natalya Kristeva.
Bu problema taa pek keskinnendi pandemiya dönemindä. Geçän yıl COVİD-19 hastalıından birkaç üüredici geçindi. Bununnan baalı Natalyä Kristeva bütün ürektän danıştı kollegalarına:
«Alarak esaba pandemiyayı, herbir üürediciyä dileerim korusunnar saalıklarını, ayakta bulunsunnar, kuvetli olsunnar. Herbiri ürektän sevsin işini hem uşakları», —
Büünkü gündä Gagauziyada işleerlär 46 liţey hem gimnaziyä, 57 uşak başçası, 2 profesional uçilişä, 1 kolec hem 1 universitet.
Источник grt.md
