Video: Komratta “Geofizika” dolayın yaşayannarını baaladılar eni su sistemasına
“Geofizika” dolayın yaşayannarı kasım ayın 1-dän enidän su sistemasına baalandılar. Bundan sora onnarın evlerindä dayman olacȇk pak su.
Su sistemasının düzülmesi işleri tuttu 10 million ley, angılarını primariya kabletti grant olarak. Bundan sora insannarın evlerindä su hep olacȇk, işleyecek kanalizaţiya da.
«Tendȇrı taradı Kişinövdakı firma. Onnar düzdülär eni kanalizaţıya sistemasını. Bu rayonda 3-4 kilometra eni su sistemasını geçirdilär. Kazıldılar maasuz pınarlar, neredä koyuldu su sayıcıları», — haberlerdi «Su-kanal» kurumun uzmanı Viktor Panaitov.
Eni su baalantıalrına “Geofizika” dolayın hepsi yaşayannarı baalandılar. Su sayıcılarına plomba da şansora koyuldu. «Su-kanal» kurumun uzmanın Viktor Panaitovun laflarına görä, eni sistemanın kullanılması su kayıplarını azaltacȇk.
«Eski su sisteması burada dökmedän hem çeliktändi yarı — yarıya. Onnar insannaın aullarından geçärdilär da engel olardılar onnara. Eski trubalar hep bir patlardılar. Eni sistema su kayıplarını azaldacȇk. Umutlanȇrız, ani başka kırıklıklar bu dolayda olmayacȇk. Her ay da budandan sora biz alacȇz harcamnmış suyun 100 proţent sayılarını. Biz kendimiz kontrol edecȇz kayıpları», — nışannadı «Su-kanal» kurumun uzmanı Vİktor Panaitov.
Geofizika rayonun yaşayanı Galina Sukman söleer, ani ilerdän suylan dayman problema vardı. Herzamankı kırıkların beterinä insan hep bir susuz kalardı. Kanalizaţiyanın yoksuzluu zorladardı insanın yaşamasını.
«Kanalizaţiya hiç bir zaman yoktu. O pek bizä läzımdı. Şindi eni yaptılar, kullanacȇz. Vakıt gösterecek» , — söledi Galina Sukman.
Kasım ayın 1-dän 226 ev Geofizika rayonunda baalandılar eni kanalizaţiya hem su sistemalarına.
Источник grt.md 04.11.2021