Video: KOMRATTA ALEKSANDR STOYANOGLOYU TUTTURMA AKŢİYASI GEÇTİ
Moldovanın genel prokurorunu Aleksandr Stoyanogloyu informaţiya hem korrupţiyaya karşı prokuraturanın uzmannarı 72 saada kapadılar. Ona açtılar ceza işini, angısını sayȇrlar baalı korupţiyaylan.
Avtonomiyanın yaşayannarı ceviz ayın 6 – da Gagauziya Bakannık Komitetin hem Halk Topluşun binanın önündä geçirdilär akţiyayı tutturmaa deyni MD genel prokurorunu Aleksandr Stoyanogluyu. İnsan şaşȇr, ne olȇr bizim memlekettä.
“Bendä hiç yok laf. Adam, angısı korulu bütündän MD Konstituţiyasınnan, prokuratura kanonnarınnan. Nasıl var nicä olsun bu iş? Bu bir adam, angısı korulu hepsi devlet bölümnerinnän, da onu bir günün içindä çıkarȇrlar iş erindän, hep o gün açȇrlar ceza işini, hep o gün kapȇrlar. Açan açılȇrlar ceza işleri, lääzım insanı seslesinnär marturlar, toplansınnar materiallar – bu hiç olmadı, nicä bunu annamaa?”
“Biz geldik tutturma Aleksandr Stoyanogluyu. Kapamaa bir gündä, o taman lääzımdı geçirsin press – konferenţiyayı. Bezbelli korktular, bän ölä sayȇrım”.
Gagauziyanın Halk Topluşun başı Vladimir Kısa bu işi baalȇȇr politikaylan.
“Bän görmeerim burada hiç bir da kanona karşı gitmäk işini. 3 saadın içindä çıkarmaa iş erindän hem kapamaa adamı – bu plana koyulu bir akţiya”.
Gagauziyanın Halk Topluşun başın yardımcısı Aleksandr Tarnavskiy çizgiledi, ani bu olay var nasıl olsun devletin gelecää için pek korkunçlu.
“Aleksandr Dmitrieviç herzaman esaplı hem da derin fikirli bir profesional, bununnan o ayırılȇr”, — nışannadı avtonomiyanın kanondakı bölümün uzmanı Grigoriy Dülger.
Grigoriy Dülger çizgledi, ani bölä olay ne oldu düün ilk sıra geçti diil saadece Gagauziyada, ama bütün memlekettä dä.
Akţiyanın bitkisindä okundu rezolüţiya, angısında toplantının pay alannarı danışȇrlar MD kuvetlerinä kolversinnär Aleksandr Stoyanogloyu.
Aleksandr Stoyanoglo MD genel prokurorun iş görevindä çalışȇr 2019 – cu yılın kasım ayından.
Источник grt.md
