(Video) Kasaba hem küüyü arası avtobuslara paalar büüyüdülär
Moldovada mart ayın birindän kasaba hem küüyü arası avtobuslara paalar büüyüdülär. Eni paalara görä kasaba arası avtobuslara bilet 60 bandän 70 banä bir kilometra için paalılandı, küüyülär arası avtobuslara 60 bandän 80 banä kadar büüldü.
Komrat avtostanţiyası bu sabaa hergünkü gibi çalışardı. Reyslar işlärdilär nicä lääzım, insannar biletları alardılar. Ama insan çok yoktu. Avtostanţiyanın başı Vladimir Çeban nışannadı, ani paalar çok büümedi, ama yolcuların sayısı var nicä azalsın.
VLADİMİR ÇEBAN Komrat avtostanţiyasının başı: “Kişinöv kasabasınadan bilet 57 leydän 67 -yadan büüdü. Çadır-Lungadan Komrada 22 leydı, tranzit oldu 27 ley. Reys Çadırdan Komrada ilkin 28 leya kadar kalktı, sora çorbacılar danıştı indirmää payi 26 leyä. Valkaneşä edärdi 50 ley, oldu 57. Küülerä Komrattan paa bir kilometra için 80 banä kalktı. Deyelim, ilerdän Komrattan Kirsovayadan 6 ley 60 bandı, şindi 8 ley 80 ban”.
Şoförlar umutlanȇrlar, ani biletların paalılanması yardım edecek onnara kimi harcamakları baalı petrol malların satın alınmasınnan, kapamaa, neçin ani gün gündän onnar hep kalkȇr.
“Komrattan Kişinövadan 10 leyä bilet paalılandı. Bu dil pek çok”.
“İnsan kendi şaşȇr ne olȇr da bilmer ne yapmaa. Ama paalar 10-12 leyä kalktı. Kişi, kimä, deyelim, lääzım olacȇk gitmää bir erä, savaşacȇk iki yolculuun erinä birinin sınırında işini bitirmää”.
Yolcular aalaşȇrlar, ani bakmayarak büümüş paalara, yok ne yapsınar – gitmää avtobuslan zoora kalȇrlar.
“Bişeyä şaşmȇrım. Hep okadar lääzım gezelim, borç alacȇk etişmärsaydı parası, ama hep okadar gidecek nereyi lääzım”.
“İstärdik ki bir paa olsun, diyşmesin. Neçin ki paalar kalkȇr, kazanç parası da insanın küçük”.
“Bizä deyni prost”.
“Diliz kayıl bununnan, pensiyalar küçük, kazanç parası küçük. İnsana sa bolniţaya ya başka işlär için lääzım gitmää. Yok ne yapalım”.
Moldovanın infrastruktura hem bölgä ilerletmesi ministerlii şoförlar asoţiaţiyasının temsilcilerinnän küçük ayın 10 paaların üüselmesi için annaştılar ondan sora, nicä şoförlar küçük ayın 7-dän 9-dan protestlara çıktılar.
Источник grt.md
