Video: İlie Argatu Evropa çempionatında bronza ödülünü kazandı
Çernogoriyada, Budva kasabasında başarıldı Evropa çempionatı boks sport çeşitindä gençlerin aralarında. O geçti canavar ayın 14-dän-24 dän. Moldovanın komandası bu yıl Evropa yarışmaklarında kazandı 5 bronz ödülü. Tarayıcıların aralarında gagauz sportçusu İlie Argatu.
Moldovanın 5 sportçusu çıktılar Evropa yarışmakların boks uurunda yarım finalına. Onnarın aralarında – Komart kasabasının boks okulun terbiedileni İlie Argatu. O geçirdi iki güreşi, angılarını taradı. Finala karşı tarattı Armeniya devletindän sportçusuna Genriha Saharäna. Butakım İlie Argatu oldu yarışmakların bronz ödülcüsü.
İLİE ARGATU, Evropa yarışmakların bronz ödülcüsü: “Bän üzülü kaldım, bän taradım bitki güreşi, da vermedilär bana taramayı. Büün kaldım gücenikli. Bana deyni nışandı, ani bän diildım hazır nicä lääzımdı. Da bän ileri dooru taa sıkı hazırlanacam. İlk konkurentımı hızlı taradım. İkinci konkurentlan üç raund geçirdim hepsini taradım. Üçüncü armändı, bän onu da taradım, ama bana taramayı vermedilär”.
Trener Şerali Turgunov nışannadı, ani onun sportçusu yaralıydı hem suuklamıştı, ne belli oldu onun çıkışında. Zapetmeklär dä, angıları baalıydılar pandemiyaylan, zoorlattılar hazırlanmayı, çünkü taa az geçirildi sınışlar.
ŞERALİ TURGUNOV, boks uurunda trener: “Büük sevinmelik bizä Gagauziyaya hem bütün Moldovaya. Taa bir sevinmelik bizim kızımız okuldan hazırlanıp, kazandı gümüş ödülü hep Evropa yarışmaklarında Orak ayında. Bu Kseniya Koronçuk, pek ii sportçu. Pek sevineriz, ani bizdä iki Evropa ödülcüsü, angıları üürenerlär boks uurunda”.
KSENİYA KORONÇUK, Evropa Çempionatın ödülcüsü üürenicilerin aralarında: “Yıl zordu, Evropa yarışmakları hep diildilär iilin. Bän ilk taradım sportçuu İtaliyadan 5-0. Türkiyadan sportçuyu taradım hep bu sayıylan 5-0. Davacılar verdilär bana puannarı. Ona taa yaptım nokdaun, da ondan da puannar bana geçtilär. Rusiyadan sportçuya tarattım sayıylan 3-2”.
Sportçuların terbiedicisi nışannȇr, ani kabledilmiş ölçülär durgutmȇȇrlar boksörları, angıları isteerlär kazanmaa üüsek çıkışları, onnar gelerlär zala geçirmää hergünkü sınışları. Bunu göreriz bizim çocukların üüsek ödüllerindän halklararası arenalarda.
ŞERALİ TURGUNOV, boks uurunda trener: “Zor, pek zor bu koyulmuş ölçülärlän, turnirların geçirmesindä yok yarışmak, sade devlet çempionatları açık ringlarda. Yok neredä geçirmää sınışları ki onnar taa kaavi hazırlansınnar. Pek zor üürenmäk-sınış toplantılarınnan. Bunnar hepsi belli edelerlär sportçularda”.
Evropa çempionatı üniorların aralarında geçti Çernogoriyada Budva kasabasında. Yarışmaklarda pay aldı 340 sportçu 38 devlettän. Komandaların aralarında ilk eri kazandı Russiya Federaţıyası, ikinci erdä Ukraina hem üçüncüdä Armeniya.
Источник grt.md
