Video: Halk Topluşun bücet komissiyası primarlarlan baktılar yaslalara verilän paraların pay edilmesinnän baalı soruşu
Halk Topluşun ilerlemäk hem finans, bücet, investiţiya, ekonomika politikasında komissiya konsultaţıya oturuşunu primarlarlan geçirdi. Oturuşun süresindä laf gitti paralar için, angıları devlet bücetindän yaslalara veriler.
Primarların bir boyu nışannadılar, ani paralar birtürlü daadılmêrlar. Kıpçak küüyün primarı danıştı deputatlara, ki bu sıra dooru bu soruşa yaklaşsınnar. Pralar yaslaların aarasında dooru pay edilsinnär.
«Neredä doorulu?. Nekadar bizi gücendirdilär. Beki kimseydä yok kabaat, ama birliktä düşünelim, neredän para bulmaa hepsinä deyni. Bitki üç yılın süresindä te o paralar,angıları devlettän gelerlär. Yazık, ani büün Bakannıık komiteti burada yok ,onnar hep bir sölerlär, ani devlet kabaatlı, ani bizä para verilmer»,- söledi Oleg Garizan.
Deputatlar üürenip bücet kanon proektini geldilär karara, ani Bakannık komiteti birtürlü avtonomiyanın yaslalarına para pay etmer. Kanon kurucuları sayêrlar, ani devlettän gelän paralar esaplı harcaanmêrlar.
«Biz sayêriz, ani avtonomiyanın uşak başçalarına birtütlü para pay etmerlär. Bu diil normal bişey. Kimi yaşamak erlerina bir koeffiţient koyêrlar ,öbürlerinä başka. Bu finans Bakannıın işi. Bu problema onnarın beterinä oldu. İstedik buluşalım, ki bulmaa deyni çıkış. Bir taraftan yardım etmää te o primarlara, angıları sayêrlar, ani az para kablettilär. Ama öbür taraftan da gücendirmemää te o primarları, angıları kablettilär yaslalara deyni bücetlerini. Çiçek ayı şansora. Bu problema diil lääzım olsun sebep kavgalara. Biz lääzım Bakannık komiteitn bakışını da üürenelim,ama onnar gelmedilär», — açıkladı HT bücet komissiyasının başı Nikolay İvançuk.
Oturuşun süresindä bir sıra teklif belli edilidi, angıları beki çıkış olacêklar kurulmuş durumda.
«Neetimizä koyduk bu soruşu taa kaldırmaa. Taa diilim hazır sölemää, nedän çekedecez işlemää, ama birkaç ideyä var gelän yıl için. Ama bu yılın ucunu taa lääzım bulmaa. Çikêr, ani Halk Topluşu finans bakannıınnan yaradılmış problemaları bu para pay edilmesinin mehanizmasınnan baalı lääzı olacek çözsün», — nışannadı İvançuk.
Источник grt.md
