Video: Güüs kançer hastaların sayısı büüyer
Her yıl belli ediler binä yakın karı, angılarında güüs kançeri var. Onnarın sayısı yıl-yıldan zeedelener. Komrat poliklinikasında bitki yılın süresindä sayıya koyuldu 16 kişi bu hastalıklan.
Devlet Saalık ministerliin haberinä görä güüs kancer hastalıı taa sık bulȇrlar elli yaşından taa büük karılarda. Mediţina uzmannarın bakışına görä bu olȇr o sebeptän, ani insannar pek geç doktorlara danışȇrlar.
ELENA EPUR, onkolog: «Güüs kançer ilk eri alȇr karı hastalıkların sayısında. Bizim regionda bıldır 16 karıda güüs kançer hastalıı belli oldu, ama şükür başlankı stadiyada, ama var da dördüncü stadiyada. Bu olȇr ozaman, açan karılar korkȇrlar yada vakıtçasına gitmeerlär kendi saalıını kontrol etmää. Gagauziyada sayıda durȇr 245 güüs kançer hastası».
Güüs kançer hastalıın sayısı Moldovada büüyer. Vakıtçasına yapılan mammografiya skriningı verer kolaylık taa erken hastalıı billi etmää, taa ilk simptomnarın peydalanmasınadan.
ELENA EPUR, onkolog: «Kançer hastalıınnan güreşmäk sık baalı zamanında profilaktikaylan. Biz lääzim dayman kendi kendi bulalım hastalıın simptomnarını. Lääzım her yıl gitmää doktorlara-onkologlara da bakmaa kendimizi».
20 yaşından karılara nasaat ediler her ay kontrol etmää kendini, 35 yaşından sora — bir keret yılda yapmaa mamografiyayı. Karılar savaşȇrlar vakıtçasına geçmää kontrolü.
Her yıl canavar ayında geçer halklararası ayı, ki haberlemää insannarı güüs kançer hastalıı için. Onun neeti nasaat etmää insannara bu hastalıın profilaktikasını vakıtçasına yapmaa.
Источник grt.md 14.10.2021