Video: COVİD-19 ULAŞMAKLARI ZEEDELENER
Covid-19 ulaşmakların zeedelenmesinin beterinä, Moldovaın Hatalı olaylar komisiyası devletin kasabalar hem küülär için hatalı «Eşil», «Sarı», «Turuncu» hem «Kırmızı» kodlarını kabletti, bakarak hastalık sayısının uuruna 100 bin kişiya. Gagauzianın cümne saalıı korumak merkezin son haberinä görä, «kırmızı kod» Karbaliyada hem Kongazçik küülerdä hem Valkaneş kasabasında koyulu.
Birkaç aftaların süresindä zor ȇpidimiologiya durumu avtonomiyada belli oldu. Kalabalık oluşlar dışarda zap edildilär. Sport oluşlarına hem sport zallalarına yakışȇr gelmää sade negativ testlan, aşılanmak sertifikatınnan yada dokumentlärlän, angılarında yazılı, ani kişidä covid hastalıına karşı imunitet kuruldu. Hep bu kurallar geçer restorannarda, barlarda hem kafelerdä. Uzmannar nasaat ederlär insannar esaba alsınnar hepsi kuralları hem unutmasınnar onnarı kullanmaa.
«Bir aftanın süresindä Komrat rayonunda 98 olay sayıya koyuldu. Çadır rayonunda 38 eni Covid-19 olayları.Valkaneştä — 50 olay belli deildi. Orta yaş 50-40, onnarın arasında gençlär dä var», — haberledi Gagauzianın cümne saalıı korumak merkezin çalışanı Tatyana Avramova.
Turuncu koda görä üüretim kurumnar sırasında çalışacȇklar, ama koledjlar hem universitetlär hatalı olaylarda Millet komisiyasının kararına görä online ürenmeyä lääzım geçsinnär. Cümnä saalıı korumak merkezin uzmanı Tatyana Avramova nışannadı, ani Covid-19 olayları üüretmäk kurumnarında zeedelener.
«Komrat rayonunda 9 üüretmäk kurumnarında covid belli edildi. Onnarın arasında 2 uşak başçası. Orada 150 uşak karantindä», — söledi o.
Gagauziyada Covid-19-dan aşının birinci dozasını 18 bin 874 insan koydurdu, o 15 % yaşayan. İki doza 13 bin 774 kişi koydurdu, o 11 % vatandaş. Bakmayarak zor ȇpidimiologiya durumuna, insan istämeer aşı koydurtmaa, nişannadı Cümnä saalıı korumak merkezin uzmanı Tatyana Avramova.
«Etkiler o, ani bizim insan istämeer aşı koydurmaa. Türlü «ȇkspertlär, angıların annamaları mediţınada yok, notasını aşılara koyȇrlar. İnsan da inanȇr», — söledi Avramova.
Saalık Ministirliin haberinä görä, devletin medik kurumnarında zor durumda 619 hasta var, 13-cü soluk verän aparatlara iliştirili.
Источник grt.md 05.10.2021