Video: Beşalmada açıldı raametli Olga Unguränunun resim sergisi
Çok yılkı dostluluu, utançlıını, becerekliini, zanaatını hem bitmäz sızan bilgilerini resimcilik uurunda anmak için Beşalmada Olga Unguränu-Parfönovaya adalı sergi açıldı, neredä gösterili onun bitki resimneri. Onnarı o etiştirämedi göstermää onun ustalıını sevennerä, çünkü bildir geçindi.
Olga Unguränu-Parfönova geçindi uzun hastalıından sora. O 46 yaşındaydı. Bitki yıllar Olga işledi Komrattakı Dmitriy Savastinın adına resim okulunda. Onu anmak için Beşalmanın muzeyindä kurulu onun bitki resimnerindän bir sergi, angılarını o ölä da etiştirämedi göstermää sevän onun zanaatını geniş auditoriyasına. Bu işlärlän artık var nasıl tanışmaa, nışannadı anılmış resimciykanın dostu Lüdmila Karaçoban-Marin. Êkspoziţiyada gösterili Olganın en özäl bitki çizilmiş işleri.
Olga Unguränu-Parfönova – anılmış Gagauziyada hem aşırıda resimciyka, duudu kıran ayın 12-dä 1974-cü yılda, başardı Tiraspoldakı devlet üniversitetini. O baaladı yaşamasını resimciliklän. Yaşamasının bitki 10 yılında öndercilik etti Komrat resim galereyasında.
Onun zanaatı geniş maanalı. Olganın bitki yaradılmış resimnärlän debüt sergisi duygulandırdı hem şaştırdı gençleri onnar girdiynän muzeya. Burada gösterili sade birkaç resim Olganın bitki 40 işindän.
“Beni şaştırdılar Olganın bitki resimneri, onnar diil nicä başkaları, hem pek maanalı, açık renkleri da, boyaları da. Bu resimnerdä açıklanılêr bir büük annatma. En pek sevdim onun sarı renklerindä resimnenmiş kızı, pek gözäl yazılı kahramannarı, şıralı boyaları da”.
“Pek beendim, hiç bilmääzdim, ani var bölä incä zanaat uzmanı Gagauziyada, ama şindi üürendim, da pek hodullanêrım. Okadar gözäl yazmış hem göstermiş. Gözümä ilişti kırmızı çiçeklärlän resim. Pek dual yazmış hem sevindirer gözünü, duyguları açêr”.
“Pek beendim duallıını, angısını kullanmış yazarkana resimneri, natürmort pek açık hem şıralı gösterili. Kız da pek gözäl, resimnerä hepsini kolay görmää hem annamaa avtorun neetlerini işlerindä”.
Beşalmada kurulu sergidä gösterili grafika işleri, angılarının arasında en göz çekici fantaziya kompoziţiyası hem natürmortlar.
Olga Unguränu-Parfönova pek anılı nicä Gagauziyada, ölä da aşırıda. O hep pay aldı türlü uurlarda geçirilmiş sergilerdä. Olga anıldı serglerinnän Türkiyedä, Poloniyada, Biyaz Rusiyada hem başka devletlerdä. Onun işleri bulunêrlar devlet hem özel kollekţiyalarında dünnänın çoyu devletlerindä.
Источник grt.md 05.11.2021