(Video) Başküüdä andılar Afgan cengin askerini Mihail Tanasogloyu
Kirsovo küüyündä Afgan cengin askerini Mihail Tanasogloyu andılar. Onun adına gimnaziyanın üürenicileri konţerdi hazırladılar. Oluştan sora üürenicilär okulun aulunda meşä aacını haşladılar.
Мihail Tanasoglo 1959 yılda Kirsovo küüyündä duudu. Orta okulu duuma erindä başardı, sora Sızran kasabasında Üüsek uçak asker uçilişçesindä üürendi. Afganistanda asker bölümündä Мi-24 vertolödunda komandirdi. 145 cenk uçuşu yaptı. 1982-ci yılda yanvarin 15-dä indirdiynän disant askerlerini, duşmannar onun vertolötunu urdular, o düştü da Мihail Tanasoglo öldü.
Leytenanta Tanasogloya girginnik için Kırmızı yıldız ödülü diveç verildi. Tragediya gününü aklısına getirtti onun asker ortaa İlya Unguränu.
«Biz onnan her avşam buluşardık. Mişa şen delikannıydı, herzaman gitarada oynaardı. Aklımda tutȇrım, açan voenkomada geldik. Bän kimseyä sölämediydim. Tabutu voenkomatın auluna maşınaylan girdi. Mişann anasını-bobasını zordu görmää. Büün dä onnarın uzlerini aklımda tutȇrım», — paylaştı İlya Unguränu.
«Bizä hem uşaklarımıza deyni önemli, ki bilsinnär hem üürensinnär kendi vatandaşların kahramannıı için hem unutmasınnar onnarı, kim bizimnän yokartık», — söledi Afgan cengin veteranı Viktor Alerguş.
Мihail Tanasoglo kendi Vatanın önündä borcunu bütündän yaptı, söledi Gagauziyanın Halk Topluşun başı Dmitriy Konstantinov.
«Мişayı harakterli, harizmalı hem kararlı adamdı. Onnar, kim isteerlär bu zanaatı ayırmaa, lääzım bu çocuun harakterinnän hem kahramannıınnan tanışsınnar. Butakım adamnar – asker zanaatını lääzım seçsinnär», — söledi Dmitriy Konstantinov.
Başkanın adından Afgan cengin veterannarına Komradın dolay administraţiyasının başı İvan Topal danıştı.
«Sayȇrım, ani kuvetlerimiz Afgan veterannarın yanında lääzım olsunnar hem büük dikkatlıı onnara göstersinnär. Cenk herzaman çok can alȇr. Bu askerlär evä döndülär. Ama 15 bin genç olan o cenktä öldülär. Bu büük kahır ana-bobalara hem senselelerä deyni», — söledi İvan Topal.
Mihail Tanasoglonun eşi Elena her yıl anmak günün geçirmesi için şükür ettti hepsini.
«Şükürüm o insannara, kim anmak oluşunu hazırlȇȇr hem geçirer. Sizin hatırınızlan Mişa için hepsi üürendi», — söledi o.
Tanasoglo adına gimnaziyasının üüredicilerin adından direktor Mariya Boykova nışannadı, ani “anarkana halkımızın kahramannarını, uşaklarımızda patriotizmayı hem dostluu terbiederiz».
Üürenicilärlän hazırlanmış konţert programasında türkülär öttülär, şiirlär okundular.
Gimnaziyanın aulunda internaţionalist-askerin anmak günündä kırmızı yapraklı meşä aacını haşladılar hem Mihail Tanasoglonun mezarına çiçeklär koyuldular.
Источник grt.md
