Video: “Bän seçerim yaşamayı”. Komratta yaşayannar kalktılar evsiz hayvannarın korumasına
«Bän yaşamayı seçerim» evsiz hayvannarı korumak akţiyası Komratta geçti. Asoţiaţiyanın pay alannarı muniţipal nasaatına yalvarımnan hayvannarı enimää danıştılar. Onnarın bakışına görä, bu kolaylık yardım edecek evsiz hayvannın sayısını azaltmaa.
Evsiz hayvannarın koruyucuları sayȇrlar, ani Komratta bitki vakıtlar köpekleri otalamak olayları sıklaştılar. Erideki kuvetlerin dikkatlıını problemanın çözülmesinä çekmää deyni, onnar hayvannarı korumak için akţiyasını geçirdilär. Komradın primariyasının önündä kasbanın sokaklarında kedilerin hem köpeklerin patretlerini astılar. «Bän yaşamayı seçerim» adında akţiya geçti.
АLİNA MİHALKİNA, «Bän yaşamayı seçerim» iniţiativ bölüün pay alanı: «Hayvannar zeettä ölerlär. Onnar kasabamızda çok var. Çıkış, angısını biz kuvetlerä teklif edriz — enilemää hayvannarı. İslää olacȇydı evsiz hayvannara maasuz ev açsınnar, bu kuvetlerimizin elindä kabledilecek bir karar».
Akţiyanın pay alannarı sayȇrlar, ani evsiz hayvannarı öldürmäk — cansızlık insanın tarafından.
АNGELİNA KİRÇU: «Bän yaşamayı seçerim» iniţiativ bölüün pay alanı: «Bän bir köpää doyurardım, DSU dolayanında. Buldum insannarı, kim onu hazırdı almaa evinä, ama bir gün etişmedi. Köpää öldürdülär».
Komradın primariyasına her ay yaşayannarın yakın 90%-di evsiz hayvannara aalaşȇrlar. Yayan gezän insannar onnardan korkȇrlar. Sokaklarda gezän köpekleri kendi yaşayannar zeedelederlär. Problemayı çözmää pitomnik ta yardım etmeyecek, sayȇr primar Sergey Anastasov. Ama onu muniţipiyada yapmaa erideki kuvetlär GHT taa 2018-ci yılda danıştılar. Maasuz komisiyaylan kabledildiydi karar, ani Gagauziyanın üç kasabasında evsiz köpeklerä deyni yaşamak evlerini yapmaa, ama kanon taa kabledilmedi, söledi primar.
Hayvannarı sevennär sayȇrlar, ani kasabanın evsiz hayvannarın problemasının tek çözmäk yolu — onnara deyni koşulların kurması.
«Çıkış çok var, onnarın birisi – klinika, neredä köpeklerin kulaklarına damgaları koyȇrlar. Bu gösterer, ani onnar aşılanmış, insannara korkunçlu diil da sokaklarda problemasız yaşȇȇrlar».
Evsiz köpeklerin probleması aktual hem da çoktan. Herbir hayvan insannan sıbıdılmış sokaa – insannıın cuvapsızlıını gösterer. Bunu lääzım aklılarımızda tutalım da brakmayalım onnarı düüsünnär yada öldürsünnär.
Источник grt.md 01.11.2021