Valkaneştä «Zabota» merkezi Ukrainadan insannara bir vakıda ev oldu
Ukrayinada korkunçlu durumun beterinä Valkaneş kasabasında açıldı «Zabota» merkezi, neredä kablederlär cengtän kaçan insannarı. Nicä çalışȇr merkez şindiki zaman, üürendi bizim korrespondent.
Valkaneş kasabasında «Zabota» merkezindä şindiki zaman Ukrayinadan gelmä 16 insan var. Ama gün-gündän onnarın sayısı zeedelener.
Yüliyä Odessadan aylesinnän Gagauziyaya Palankayı geçip geldilär. 3 kilometradan zeedä yayan iki uşaklan elindä geldilär. Etiştiynän sınıra ansızdan üürendilär bu merkez için.
«Beendik bu merkezi. Bizi ii karşıladılar. İslä doyurȇrlar. Kaçan statusunu kabletmää istämeeriz. Umutlanȇrız,ani tezdä çirkin işlär bitecek, dä evä geeri dönecez», — paylaştı Yuliya.
Yana Kiriçenko Nikolayȇv kasabasından kaçan. Umudu kaybetmeer,ani nezaman sa evä dönecek, ama şindi aylesinnän «Zabota» merkezindä yaşȇȇr.
«Sınıra etiştik kendi maşınamızlan. Sora dostumuz karşı çıktı bizä, ölä dä etiştik bu merkezä. Bizä burada islää. Hepsinä şükür deeriz. Ama evä isteeriz. İnanȇrız, ani hepsi islä olacȇk», — söledi Yana.
Etiştiynän merkezä, GRT-nın çekim grupasına karşı çıktı karı torununnan kucaanda. Valentina Katana Odessa kasabasından. Te ozaman, nicä başladı durum Ukrayınada diişilmää, onnar Gagauziyaya geldilär.
«Bizä karşı çıktılar. Pek islä insannar . Hepsi yardım eder. Uşak hastalandı bizä ilaç hem ne lääzım verdilär. İsteeriz evä dönmää. Taa büük torunum okula gezer, te mamusu gitti onu almaa», — annattı Valentina.
Merkezdä, neredä Ukrayınadan kaçan insannar bir vakıda durgundular, psiholog çalışȇr, o yardım eder uşaklara professional uurunda.
«Biz uşaklara yardım ederiz ev işlerini yapmaa, angılarını okullarda vererlär. Hepsi uşaklar ii. Problema yok . Onnar çalışkan. Üürenerlär», — söledi Lüdmila Stugiç, «Zabota» merkezindä psiholog.
Merkezdä var 3 6-8 kişilik oda. İnsannara deyni hepsi koşullar yapılı. «Zabota» merkezi çalışȇr volontörların hatırınnan.
«Para kimseydän almȇȇrız. Sade malları kablederiz. Kim mal getirer, kim başka iş. Çoyu volontörlar istämeerlär onnarın adlarını söleylim. Getirerlär salfetki, imäk mallarını, uşaklara ne lääzım olaarsa. Şindiyadan zorluk okadar yoktu. Şükür insannara hem primariyaya», — nışannadı Janna Kelban, «Zabota» merkezin başı:
12 uzman «Zabota» merkezindä Valkaneştä çalışȇr. Volontör olarak 5 kişi tertiplemäk işlerini yapȇrlar, 6 ayırı profildä üüredici var.
Источник grt.md
