Valkaneştä su proektini temsil ettilär. İşlär nezaman başlayacek?
Türkiyedan uzmannar Valkaneş kasabasında su sistemasının enilenmesinnän baalı proekt dokumentlerinin hazırlamasını başardılar. Proekt baktırȇr kasabadanın hepsi yaşayannarın evlerinä islää suyun çekilmesini. Geçennerdä proektı hazırlamış uzmannarın hem TİKA agentstvosunun toplantısında Valkaneştä tanıttılar rpoekti kasabanın önderciliinä.
Valkaneş kasabasının su sisteması yapıldıydı taa 60-nci yıllarda. Büünkü günä kadar o çok eskidi, da bu beterä bir aftada birkaç sıra trubalar patlȇrlar, ne getirder büük zararlara, nışannadı «Аpȇ — Кanal Valkaneş» kurumun başı İvan Kreţu.
“Taa 60-nci yıllardan o trubalar, şansora yok nereyi işlesinnär, yaptılar kendi işini, da lääzım onnarı diiştirmää. Çok umudumuz var kardaşlarımızda Türkiyedän, ani etişecek o proekt bizä, insannar şansora 20 yıl bekleerlär onu”, — söledi İvan Kreţu.
Kurumun başının laflarına görä bütünnä proekt lääzım hazır olsun canavar ayında.
“Gagauziyanın 3 kasabasının arasında, Valkaneştä en kötü durum bu uurda. Zor insana susuz, ama ne kuvedimizdä var – yapȇrız. Vereriz suyu saat 4-tän sabaalen taa 12-ya kadar avşamnen”, — açıkladı İvan Kreţu.
«Аpȇ — Кanal Valkaneş» kurumun başı taa haberledi, ani çok kim yaşayannardan kendi kuvedinnän çeker trubaları ki baalanmaa su sistemasına. Büünkü günü kasabanın evlerindä sade 50 proţenda yakın var su kasabanın sistemasından.
“Diil çoktan geldilär da temsil ettilär proektı. İnanȇrız, ani sora etişecek Ankaraya, da sora bulunacek para yapmaa bu işi”, — söledi İvan Kreţu.
İlk esaplamalara görä, proektın paası kuracek 150 mln leydän zeedä.
Источник grt.md
