Valkaneştä reabilitaţiya merkezinin örtüsü lääzım diiştirilsin
Valkaneş kasabasının reabilitaţiya merkezindä lääzım yapılsın düzücülük işleri. Büük yamurlarda binanın örtüsü akȇr.
Valkaneş kasabasının reabilitaţıya merkezi soţial hem psihologiya yardımını uşaklara verer. Şindiki zaman 13 uzman hatır güder 20 uşak için. 2001-ci yılda merkez açıldı. 2010-cu yılda örtüyü diiştirdilär. Ozmandan beeri o eskidi hem akȇr. Valkaneş kasabasının reabilitaţiya merkezin başı Janna Kelban haberledi, ani örtüyü hemen lääzım diiştirmää.
«Yaamur yayarkana biz leennärlän gezeriz, ki suyu toplamaa. Büün biz yok nicä içansını yapalım, bu problema çözülmeyincesinä», — nışannadı reabilitaţiya merkezin başı.
Valakneşin reabilitaţiya merkezi primariyaya baalı. Primar Viktor Petrioglo haberledi, ani örtünün yapılması için erli bücettä para koyuldu. Bu yılın küçük ayında kasaba sovetinä yollandırıldı mektup, ama şindiya kadar karar bu soruş için belli diil.
«Umutlanȇrım, ani orak ayın 1-dä oturuşumuz geçecek, ozaman da soruş çözülecek. O bizä dä, merkezä lääzım. Hava durumu uygunkana örtüyü lääzım yapmaa», — söledi primar.
Esaplamalara görä, örtüyü diiştirmää deyni 250 bin ley lääzım olacȇk.
Источник grt.md 01.07.2022