Valkaneş gara dolayı var nicä susuz kalsın
Valkaneş kasabasının gara dolayında bir soruş çıktı, baalı su azalmasınan er altında. Bu üzerä 2 aydan sora bu dolayda var nicä hiç olmasın su. Erideki kuvetlär savaşȇrlar çözmää soruşu.
Birkaç ayın içindä kuraktı, bu beterä erideki derelär hem göllär iisildilär. Nicä da yaşamak punktların çoyunda, burada da gidrologiya durumu kötü uura etişti, nışannadı kasabanın başı Viktor Petrioglu.
VİKTOR PETRİOGLU, Valkaneş kasabasın primarı: “Kış zamanda da yoktu kaar, onuştan da kurudu, kimi erleri yayan geçmää var nicä. Şindiki vakıtta suylan zorluk büük yok, çünkü TİKA yaptıydı 4 kuyu, ama soruş var Valkaneş garasında”.
Derelerin hem göllerin kurumasından kaarä, başka zorluk da var. “Apȇ — kanal” kurumun başı İvan Kreţu haberledi,ani er dibindä da su may yok. Kuraklıın beterinä kuyudan çıkȇr bir tonna saatta, bu etmeyecek insana vermäk için.
İVAN KREŢU, Valkaneş “Apȇ — kanal” kurumun başı: “Düşünerim, ki barabar kuvetlärlän bunu çözecez. Ne da olmasa insana su lääzım. Biz durmȇrız, aaraştırȇrız ne yapmaa da kurtulmaa. Herbir variantı bakȇrız”.
“Apȇ — kanal” kurumu savaştı durumu düzeltmää diiştirip suyu çekän tertipleri hem başka işleri, ama durum hep ölä kaldı, açıkladı İvan Kreţu. Kararlandıydı insana Valkaneş gara dolayında vermää suyu sabaalen 6:00 — 9:00 hem avşamnen saat 18:00 -22:00.
İVAN KREŢU, Valkaneş “Apȇ — kanal” kurumun başı: “Getirdik başka nasos, iki gün işledi insan. Baktık herbir taraftan, neredän su çıkarmaa. Ama yokkana er altında neredän almaa, bu iş olmayacek”.
Soruşu bütünnä çözmää var nicä kazıp 2 eni kuyu, nışannadı İvan Kreţu.
İVAN KREŢU, Valkaneş “Apȇ — kanal” kurumun başı: “İki bur lääzım kazalım, da verelim insana su. Kışın don erdä işlemää olamayacek nicä. 5 gradus ayazda şansora kazılmȇr. Lääzım şindi bunu yapmaa”.
2 kuyu yapmaa deyni, ilk saymaklara görä, lääzım yakın 2 million ley. Bu neetlär için para yok, ama su verän kurumu aarȇr durumdan çıkışı.
Источник grt.md
