Uşak başçaları nezaman bütün kuvettän işlemää başlayaceklar?
Başlayarak kirez ayından Komradın uşak başçaları birär-birär kapandılar yaz zamanı düzüntücülük işleri için. İş sırasına görä ceviz ayın birindä hepsi uşak başçaları lääzımdılar açılsınnar, ama büün 4-cü hem 8-ci uşak başçaları ta işlämeerlär. Neylän bu baalı, annadı bizim televizion grupamız.
Komradın 4-cü uşak başçasında düzüntücülük işleri taa başarılmadılar. Bu oldu sebep ona, ani onun açılması taa bir aftaya oyalandı, açıkladı kurumun başı Otiliya Albertän.
OTİLİYA ALBERTÄN Komradın 4-cü uşak başçasının öndercisi: — “Düzüntücülük işlerini başladıynan biz karşı geldik kimi problemalarlan, angıları koydular köstek işimizä hem uzattılar onnarı taa bir aftaya. Ama bu aftanın sonunadan bizä gelecek ANSA hem Saalık Merkezi. Uzmannar büün bulunȇrlar iştä, grupalar hazır, bekleeriz uşakları”.
Uşak başçasında bu yıl düzüldü dışankı yapılar. Kurumun öndercilii umutlanȇr, ani ceviz ayın 12-dän onnar kabledäbileceklär uşakları.
OTİLİYA ALBERTÄN Komradın 4-cü uşak başçasının öndercisi : — “Siz kendiniz görersiniz, ani düzüntücülük işleri sonuna yaklaşȇrlar. Bekleeriz ana-bobaları hem uşakları”.
Komradın primar yardımcısı Georgiy Sarı nışannadı, ani herbir uşak başçasında her yıl türlü işlär yapılȇrlar.
GEORGİY SARI Komradın primar yardımcısı : — “Uşak başçalarında müdürlär kararlȇȇrlar yapılan işleri, biz dä onnara yardım ederiz neredä kuvetlän, neredä finanslan”.
Georgiy Sarı nışannadı, ani bu yıl gazın paalılıı sebepindän uşak başçaları başka problemaylan yakışȇlar karşı gelsinnär.
GEORGİY SARI Komradın primar yardımcısı : — “Düşüneriz kultura evindä geçirmää bir eksperement, başlamaa isıtmaa elektrik yardımınnan. Başarılı olarsaydı uşak başçalarını da bu yısıtmaya geçirecez”.
Büünkü gündä Komratta 7 uşak başçası işleer, Onnara gezerlär 1000 uşaktan zeedä.
Источник grt.md 06.09.2022