Türkiye iş adamnarı Gagauziyaya para yatırımları kolaylıklarınnan tanıştılar
Moldovanın hem Türkiyenın iş adamnarının aralarında biznes forum geçirildi Gagauziyada. Böeliklän verildi kolaylık Türkiyenın iş adamnarı tanışsınnar Gagauziyanın hem Moldovanın bizneslarını kurmak için koşullarınnan.
Komratta başardı işini Moldovada geçirilän biznes forum. Toplantıda pay aldılar iş adamnarı Türkiyenın en büük biznes uurlarından.
Katıldı sözlerä Gagauizyada bulunan sayın büük konsul Hasan Akdogan. Türkiyenın diplomatı nışannadı, ani buluşmaklar yardım ederlär gelän musaafirlerä taa yakından tanışmaa Gagauziyaylan hem notalamaa kolaylıkları hem koşulları işlerinin ilerletmesi hem geliştirmesi için.
“Gagauziyanın hem Türkiyenın aralarında özel baalantılar biznes uurunda. İi ki burada var çıkışlar Moldovaya hem Gagauziyaya Evropa birliinä deyni, hem Aziya tarafına”, — söledi Hasan Akdogan.
Gagauziya meraklandırêr halklarası biznes birliklerini. En pek buna yardımcı oldu avtonomiyanın er üzündä uygun erleşmesi, neredä var açık yol Djurjuleştı portuna, Tuna deresindän olsun deyni kolaylık geçirmää malları alış-veriş için. Serbest satılık zonası Valkaneş kasabasından koyaladacek iş adamnarın baalantılarını, nışannadılar Türkiyenın temsilcileri.
“Biz tanışmak için geldik Gagauziyaya. İi olacek geliştirelim proektlarımızı, avantaj da burada ii var”, — açıkladı Mustafa Kabadayı, Mersin kasabasının düzüntücülük kurumunun temsilcisi.
“Türkçe bizi çok şaştırdı, tarihimiz bir, kankardaşlarımız gagauzlar, bunun yardımınnan da açıldı havezimiz kurmaa baalantıları”, — söledi Orhan Kemal Üksel
“Gagauziyanın var ii limannarı, Buradan yakın alış-veriş Ukraina devletinä hem Rusiyaya, bu uur için var limanınız, neredä gemilär 3 buçuk bin ton mal geçirsinnär”, — nışannaı Ufuk Maya.
“Düzülär ipradılmış, pek eski, bän düşünerim, ani işleyecäm, var arkadaşlarım, angıları artık burada çalışêrlar”, — paylaştı arhitektor Selämi Aracı.
“Moldovanın hem Gagauziyanın çiftçilik uuru pek meraklı, kayılız burada üüredelim emişlerin tertiplemesini, nesoy yaapmaa”, — söledi Anamura alış-veriş palatasının öndercisi Ferdun Torunoglu.
Türküyenın iş adamnarını Moldovaya teklif etti Türküyenın büük elçilii. Gagauziyanın Başkanı İrina Vlah nışannadı, ani en ii ortkların birisi herzamandı Türkiye, çünkü onnarın yardımınnan burada açıldı çok iş erleri.
“Hoş geldiniz Moldovaya hem Gagauziyaya! Gagauziya sizin için ii bir ada biznes yaratması hem yaşatması için. Biz sizin, siz dä bizim yardımımızlan çok proektları geliştirdik, ne faydalı herkezinä”, — nışanadı İrina Vlah.
Biznes — forumun pay alannarına deyni kuruldular proektlarlan tanışmaları. Gösteridli örneklerdä nesoy var nasıl kolay hem faydalı işletmää biznesi Gagauziyada. Avtonomiyada açıdılar çok kurumnar, neredä malların satılması da çözüldü, kuruldu iş erleri hem kazanç veridli vatandaşlara deyni.
Источник grt.md
