Türkiyanın yardımınnan Gagauziyada su resursların enilenmesi yolları bulunaceklar
Türkiyadan delegaţiya, angısına girdilär devlet su sistema bakannıın uzmannarı, iş vizitinnän Gagauziyaya geldilär. Onnar paylaştılar bilgilerinnän Gagauziyanın uzmannarınnan nicä yaşayannara kaliteli su vermää hem düzmää enidän yıslamak sistemalarını.
Türkiyanın su sisteması uurunda uzmannarı geldilär Gagauziyaya Başkanın teklifinä görä. Onnar hazır paylaşmaa becermeklerinnän nesoy paklamaa dereleri, gölleri hem yıslamak sistemaların düzmesindä. Bir aftanın içindä delegaţiya profil bakannıkların uzmannarınnan tanışȇrlar Gagauziyanın su sızıntılarınnan hem belli ederlär kırları, angılarını var nicä sulamaa, açıkladı Agrar bakanı Andrey Dimitroglo.
Gagauziyanın tarafından ekspertlerä veriler lääzımnı haberlär, kartalar, toprak analizleri hem başka işlär, ki onnar versinnär kendi nasaatlarını nesoy kaldırmaa üüsek uura sulamak sistemasını Gagauziyada. Türkiya delegaţiyasının temsilcisi Burzan Ovuz nışannadı, ani avtonomiyanın derelerindä yok kanallar ki sulamaa kırları. Hem ani ilerki su sistemaları enilenmedilär çoktan.
Gagauziyanın Agrar bakanı Andrey Dimitroglo nışannadı, ani proekt yapılacek çiftçi çorbacılıklarınnan birliktä.
İleri dooru Türkiyadan delegaţiya hem Agrar bakanıın uzmannarı birerdä çalışaceklar hem çözeceklär problemaları su vermäk sistemasınnan.
Reportör: Zinaida Kanţır, video: Grigoriy Stavilov, kurgu: Zinaida Kanţır
Источник grt.md 18.10.2022