Tomay küüyüdä futbol trenerı İvan Nedälkoyu andılar turnirlan
71 yaşında hastalıktan sora geçindi Moldovanın anılmış futbol trenerı Tomaydan İvan Nedälko. Bu yıl o tamannayaceydı 72 yaşını. Onun hısımnarı hem dostları kararladılar onun adını brakmaa diveç da ikinci yıl sıradan geçirerlär futbol turnirı. Bu yıl yarışmaklarda pay aldı dört komanda Joltaydan, Burlaku hem Tomay küülerindän, hem Besarabka kasabasından.
Futbol trenerı İvan Serafimoviç Nedälko verdi futbola yaşamasının en büük payını. Onun terbiedilenneri Tomay futbol klubundan kazandılar diil bir kerert ilk erleri regional hem devlet uurunda. 2004 yıldan çalışardı Çadır sport okulu Tomay filialında futbol trenerı. Hepsi kendi bilgilerini hem becermeklerini, ȇnergiyasını hem serbest vakıdını verärdi kendi terbiedilennerinä. O pek sevärdi kendi işini da bilärdi nicä yaklaşmaa herbir uşaa. Ona saygı güdärdilär analar-bobalar hem kolektivin azaları. Onun üürä boldu hem o pek duyguluydu söleerlär onun terbiedenneri.
“Bän çekettim oynamaa onun komandasında edinci klastan, o geçirärdi bizä sınışları, sora bän oynadım Tomayın toplumunda, ilktän dublördum, sora nicä futbolist. İlktän oynadık C diviziyada, sora çıktık B diviziyasına. O pek sevärdi futbolu”, -annattı futbol veteranı Sergey Topçu.
“Biz oynardık C diviziyasında, o yıllar futbol pek kaaviydi, da bu diviziyada iki komanda pek kaaviydi, onnarda vardı sponsor, da biz olduk üçüncü onnarın ardından. Bu pek büük taramak bizä deyni”, — söledi futbolcu Vladimir Dimoglo.
Bu yıl teklifi şannı trenerın İvan Nedälkonun adına turnirda pay almaa kablettilär Gagauziyadan hem Kaul dolayından dört komanda. Bakmadaan sıcak havaya oyun meydanında kızgındı hem meraklıydı. Herbir geçirilmiş matç kaaviydi nicä üüsek ligada. Komandalarda pay aldılar futbol sevenneri. Trenerların hem oyuncuların laflarına görä, turnir geçti üüsek uurda.
“Çocukların laflarına görä trenerın işi, angısı verdi yaşamasını oyuna hem futbola, bu pek önemli. Ȇntuziyazmaylan uzaa gitmeyecän, ama var insannar, angıları halizdän üürederlär bizim uşakları, terbiederlär. Sayȇrım, ani gençlär lääzım alsınnar örnek bölä insannardan”, — söledi Bessarabka dolayın başı Pötr Puşkari.
“2020 yılda yaptık turnir, onnar bizä geldilär, biz onnara gittik. Da bän gördüm ani bu insan yaşȇȇr nicä biz futbollan. Pek esaplı insan. Bän düşünerim ani ii ideyä onun adına geçirmää küüdä turnir”, — paylaştı Burlaku küüyün komandanın temsilcisi. Pötr Mihov.
İvan Nedälkonun iki torunu hep ölä baalı sportlan. Andrey sever futbolu, Dmitriy da professional uurunda aar atletikaylan zanaatlanȇr. Büük sevgiylän aklına getirerlär dädusunu.
Turnirın tarayıcısı oldu Burlaku küüyündän komanda, angısı kazandı geçän kuboo, o gelän yıla genä lääzım pay alsın yarışmaklarda. İkinci eri kazandı Bessarabka komandası hem çüncü oldular Tomay meydanın çorbacıları . Hepsinä verildi kuboklar. Baaşışladılar en ii oyuncuyu Burlaku klubundan Denis Maksimovu hem en Joltay komandasından ii vratari Dmitriy Karadjou. Onnar kablettilär şannı baaşışları.
Источник grt.md 14.06.2022