Tomay küüdä yapıldı kötü halda bulunan yollardan biri «Comunitea mea» programasının yardımınnan
Tomay küüyüdä düzdülär yolu hem trotuarı Sovetskaya sokaanda. İşlär yapıldılar «Comunitea mea» programasından finans yardımınnan. Bu programa yardım eder erli kuvetlerä ilerletmää yaşamak punktlarını. Programayı gerçekleştirer USAİD kurumu.
Lidiya Garçu yaşȇȇr Tomay küüyün Sovetskaya sokaanda 20 yıldan zeedä. Yaşayanka aklısına getirer, ani yol, angısı götürer uşak başçasına, okula, kliseyä hem anmak taşına taa ileri bulunardı pek kötü halda.
«Yol pek kötüydü, kuyularlan, derecik vardı. Şindi eni yoldan pek islä gezmää. Bakarak hem yola, hem da trotuara, gözlerin seviner, mayıl olȇrsın», — söledi Lidiya Garçu.
Sovetskaya sokaan yolunu düzmäk işleri sürttü 5 ay.
«Biz tarayaabildik 1,5 millionuk proektı. Bu paralarlan biz yaptık Sovetskiy sokaanı trotuarlan, Miçurin sokaanı kliseya kadar hem oradan Sovetskiy sokaana sapan yolu. Hep ölä yaptık maşınalar için duraa sport meydanın yanında. Sora kendi oaramızlan — 541 bin ley — yaptık liţeyın önündä meydanı hem tertipledik anmak taşınnın dolayını», — açıkladı Tomay küüyün primarı Födor Topçu.
Tomay küüyün yaşayannarı sevinerlär, ani yapıldı yol, neçinki bekledilär onu 60 yıldan zeedä.
«Gözäl, pek islä oldu, uşaklara da yakışȇr gezmää, düşmeerlär. Hepsi yakışıklı, maşinalarlan da var nasıl gelmää hem girmää uşakları almaa deyni, pek uygun».
«Pek gözäl oldu, saa olsunnar hem primar, hem nasaatçılar».
«Yolu te başardılar, şindän sora eşillederiz, getirdik kara toprak, doorudȇrız, nedän sora dikecez çiçek, büümneri tertipleriz. Gözäl, islää, hepsi eni, tertipli, biz da kendi sıramızda savaşacez paklı hem tertiplii korumaa».
Sovetskaya sokaanda yapılmış yolun uzunnuu 280 metra.
Источник grt.md
