TİKA Uzbekistanda Türkologiya Aaraştırma İnstitutunu kurdu
2022-ci yılın Baba Mart ayın 30-31 günnerindä Türkiye Prezidentı Recep Tayyip ERDOĞAN Uzbekistana yaptıı vizitında Türk dünnäsının kulturası hem dilleri alanında iki memleket arasında usta etiştirecek bir üüredicilik kuruluşun kurulmasını arzu ettiini belirtmesi üzerinä, Uzbekistan Semerkant Devlet Universitı hem Türk İşbirlii hem Koordinaţiya Agenstvosunun (TİKA) arasında yapılan görüşmelär annaşmasınnan bu universitetta Türkologiya Aaraştırma İnstitutu kuruldu hem orası Türk dili laboratoriyası teknik lääzımnıklarınnan donatıldı.
Çiçek ayın (aprel) 23-dä olan Semerkant Devlet Universitı Türkologiya Aaraştırma İnstitutun ofițial açılışında pay aldılar hem nasaat ettilär: Türk İşbirlii hem Koordinaţiya Agenstvosunun (TİKA) Başkan Yardımcısı Dr. Mahmut ÇEVİK, İpek Yolu Turizma hem Halklararası kultura varlıı Universitetın rektor yardımcısı hem açılan Türkologiya Aaraştırma İnstitutun direktoru Juliboy ELTAZAROV, Semerkand dolayın Başı yardımcısı Hurşid OÇİLOV h.t.b. Açılış sırasında okundu Semerkant Devlet Universitı rektorun Prof. Rustam HOLMURODOVun selemnama hem kutlama mesajı.
Tika Başkan Yardımcısı Dr. Mahmut ÇEVİK kendi sözündä urguladı, ani “Uzbekistanın baamsızlıını kazanmasından sora, onun kalkınmasına yardım olarak, büünkü günädän TİKA tarafından burada 1000-nä yakın proekt aslıya çıkarıldı. Türk dili, istoriyası, literaturası hem her türlü kultura varlıı gibi bütün alannarda yapılacêk çalışmaların paalılıın kazanmasınnan birliktä, Türkologiya Aaraştırma İnstitutun uuru eni kuşakların bilgilerinä ön vermää hem, özelliklän, Türk dilinin gücünü hem etkisini dünnääya bildirmää hem da Ali Şir NEVAİnin izindän gidän eni büük bilim adamnarını etiştirmää”.
Mahmut ÇEVİK açıkladı, ani “Türk dünnäsının en paalı yazıcıların çoyu Balkannardan, ölä Türkiyenin milli poetı Mehmet Akif ERSOYun memleketi Kosova türklerinin, Yahya Kemal BAYATLInın memleketi Makedoniya türklerinin hem ilk türkçä sözlüün yazıcısı Şemsettin SAMİnin memleketi Arnautluk türklerinin”. Açılış sözünü tutan Dr. Mahmut ÇEVİK Balkannarda 12 türkçä lafedän halklarından hem Balkanlardan Türk yazıcıların Semerkanta selämını getirdiini söledii zaman, zalda bulunan insannar, ayaa kalkıp, şamar urmasınnan karşladılar bunu.
Fotolar: samdu.uz
Источник anasozu.com
