Tepliţa zanaatı ilerler: Komratlı Dimça aylesi büüdülän zarzavatların sayısını zeedeletti
Bitki yılların içindä devlet aktiv yardım eder paraylan açmaa eni tepliţaları emişlerin, zarzavatların büütmesi için. Bitki vakıt tepliţaların sayısı regionda zeedelener. Agrariyalar savaşȇrlar kullanmaa eni tehnologiyaları hem ilk kabletmää bereketi, ki etiştirmää çıkmaa panayıra da satmaa ii paaya. Gelirli mı büün koymaa tepliţayı, üürendi bizim korrespondentımız.
İşä gün duumasından kauşmasınadan diil hepsi dayanabiler. Da nicä söleerlär, iş gider ozaman, açan bütün canını koyȇrsın onun yapmasına. Tepliţa işinä lääzım diil sade bilgilär çiftçilik uurunda, ama kuvet, istemäk hem eni tehnologiyaların bilmesi.
Büük tepliţa kompleksını kendinä deyni koydu Dimça aylesi Komrattan. Onun saabiykası Natalya taa çoktan istärdi bu işi yapmaa. Ama açan oldu finans kolaylıkları, kocasınnan alıp grant hem koyup kendi paralarını, açtılar kendi işini. Da nicä herbir uurda, burada da var kendi faydası hem diil ii tarafları, söleer Natalya.
“İi taraflar onda, ani burada zarzavatlar taa aaz hastalanȇrlar, hava da belli etmeer kendisini büümnerdä. Diil ii tarafı onda, ani harcanȇr çok su, büünkü günä su bizdä diil ucuz. Onun için harcamaklar her gün büük ki islamaa eri”, — söler Natalya Dimça.
Bu yıl Dimça aylesi kararladılar denemää büütmää bir — iki çeşit zarzavat. Umutlanȇrlar kabletmää ii bereketi hıyar, patlıcan, mor patlıcan, laana, biber zarzavatlarında. Kullanȇrlar aşırıdan gibrid tuumnarını, ama bu yıl seftä kullanȇrlar taa Pridnestroviyanın selekţiyasından tuumanrı, da görüp büümneri sevinerlär, açıklȇȇr Natalya.
“Nezamansa orada kaavi temeldi, da büüdärdilär ii tuumnarı, da üüsek uurda işlärdilär. Biz kararladık almaa da gibridlar, angılarını biz büüttük, bizi sevindirerlär. Biz kullanmȇȇrız beslemäk materiallarını. Biz kararladık, ani bizim aylä, yakındaklarımız, hem satın alannar alsınnar ȇkologiya tarafından pak malları. Bu taa paalı, hem vakıt taa çok. Ama bu verer garantiya, ani biz olacez saalıklı”, — söler Natalya.
Az ekmää, ama ondan sora çekeder her günkü iş tepliţada sulamaktan kaarä, baalamaa, budamaa, kazmaa. Büümnär nicä uşak, hepsini duyȇrlar, söleer Natalya Dimça. Kullanȇrlar sulamaa deyni derin pınardan suyu hem yaamur suyunu, angısını toplȇȇrlar. Sulȇȇrlar avşamneen, kalan işi savaşȇrşar erken yapmaa, açan tepliţada temperatura uygun. Nicä söleer çorbacıyka, bir günü kaçıracan, ozaman çok kolverecän.
“Te görerim, o baarȇr “SOS”. Bir bıyık, yarım hıyarın kuvedi. Te bıyıı kırdım, da görerim, ani onu lääzım baalamaa, baalȇrım, da görerim, ani hıyarlar var nicä taa dursunnar, da altı saattan sora var nicä koparmaa”, — annadȇr Natalya.
Yardım ederlär Natalyaya tepliţada onun anası hem bobası. Onnar kızınnan may her gün bulunȇrlar burada da bakȇrlar büümneri. İşin çıkışı sevindirer gözü, malez açan bereket tä gözäl. Gelirlär da var, angıları vererlär stimul ileri dooru çalışmaa.
“ Bizim bütün aylemiz eklendi, çekederäk tuumnarın ekmesindän, sora kasetalara geçirdik, sora rassad ektik, kazȇrız, ellän otları koparȇrız. Hepsini ellän yapȇrız. Diil her keret kazmayı yakışȇr kullanmaa”, — söleer Rayısa Dimça.
Çiçek (aprel) ayın sonunda aylä çıktı erli panayıra eni bereketlän hıyar hem laana satmaa, çünkü ekologiya tarafından pak mal hızlı satılȇr. Bu yıl paa taa üüsek, bakarak geçän yıla. Sebep buna energiya resursların paalılanması hem su da diil ucuz. Ama hep okadar kim isteer zanaatlanmaa bu uurlan, Natlaya Dimça nasaat eder, olsun diil sade finans, ama kaavi saalık hem istemäk. Da ozaman hepsi olacek.
Источник grt.md
