«Taramaya hazırlanmaa lääzım ii koşullarda». Beşalmada serbest güreşi için eni zalı yapaceklar
Beşalmanın genç serbest güreşçilerinä erideki kuvetlär koşulları hazırlȇȇrlar. İşlär bu afta çekedeceklär, zal yapılacek 100 m2. Paralar baş investiţyalar kanonuna görä küüyä verildi. Serbest güreşi bölük bu yıl eni üürenmäk yılından başladı çalışmaa. Nezaman proek aslıya çıkarılacek hem güreşçilär eni salona geçeceklär, Svetlana Dimitroglo üürendi.
Zamandaş serbest güreşmesi-olimpiya hem sevgili sport soyuydur. Ama ona taa dooru da yaklaştıynan, var nicä sevmää. Sarı Geyorgiyi güreşmäk sporduna yakın insannarı getirdilär.
«Güreşmeyä üç yıl gezerim. Bu sport benim üreemä görä. Açan burayı geleri, dinnenerim», — annadȇr sportçu.
Sport güreşmesi-olimpiya spordun soyu, angısı iki sportçuyu maasuz kurallara güreştirer. Şindi Beşalma küüyündä dä bu çeşit uzmannan götürüler. Serbest güreşi treneri Grigoriy Sarı universitettän sora geldi kendi duuma küüyünä işlemää. Serbest güreşi sekţiya eni üürenmäk yılından çalışȇr. Ona 42 sportçü geler.
Beşalma küüyündä trenirovkalar iki bölüktä geçirilerlär. İlk sekţiyaya 10 yaşından sportsmennär gezerlär, küçüklär için 7 yaşından 9 yaşınadan.
«Başardım universiteti. Bän işlemärdim. Valeriy İvanoviç, Grigoriy İvanoviç hem Anatoliy Födoroviç teklif ettilär serbest güreşı sekţiyaları götürmää», — annadȇr trener.
Şindiki sport odası zorlan uşakları kaplȇȇr. Onnara oda kıstaf, ama bu taa islää, nekadar ani hiç olmasaydı, neredä geçirmää sınışları, trener söleer.
«Burayı şansora sıyınamȇȇrız. Uşaklar sa hep gelerlär. Yarısına sıra geler dinnenmää, bir payı işläärkenä. Olardı er, raat-raada zanaatlaneceydık», — söler Grigoriy Sarı.
Beşalmanın var kendi kapalı sport salonu, ama o kullanırmȇr. Yapıda 20 yıl yapılmadı remont. Onu lääzım iycä tertiplemää.
«Neetliyiz bütün kompleksı düzmää. Nasaatçılarımız, primariyaylan hem deputatlan birliktä kablettilär kararı 296 bin ley vermää, ki serbest güreş için sţena yapılsın», — haberledi Beşalma küüyün primarı Valeriy Moş.
Uşakların sport uurunda saalıklı yaşamasını küüdä götürmää büüklär için önemlidir, söleer deputat Grigoriy Dülger.
«Bizim uşaklarımız talantlı. Bitki yıllar trenirovkalar yazın bu sţenada geçirilärdilär, ama suuk vakıtta burada sportçular yok nicä çalışsınnar», -nışannadı deputat.
Kapalı sport kompleksın salonun düzülmesi – var olan üç obyektin birisi, angısı baş investiţiyalarından finanslanȇr.
«Prioritetların biri — o serbest güreşi için sţena yapılsın. Duvar yapılacek, oda trenerlara deyni, diişmäk hem duş almak için», — açıkladı Grigoriy Dülger.
Serbest güreşi salonu düzmää erideki kuvetlär neetli kasım ayında. Eni odaya sportsmennär geçäbileceklär sade gelecek ilkyaz.
Reportör: Svetlana Dimitroglo
Video: Grigoriy Stavilov
Kurgu: Mariya Kazaku
Источник grt.md
