Şvețiya: Koranı yakıp țivilizațiyalılar barbarlaa yollandılar
Büük ayın (yanvar) 21-dä Şvețiya devlet kuvetlerin izininnän yapılan mitingta, Stokgolmdakı Türkiye Büükelçiliin önündä bu devletin aşırı saacıları yaktılar musulmannarın ayozlu Koran kiyadını.
Nicä bildirer dünnää habercilik kuruluşları, Büük ayın (yanvar) 21-dä daniyalı aşırı saacıların “Sert uur” kurulusun başı Romus PALUDAN, provokațiya yaparak, Stokgolmdakı Türkiye Büükelçiliin önündä yaktı musulmannarın ayozlu Koran kiyadını.
Bu barbarlaa karşı bütün musulman dünnääsı hem haliz țivilizațiyalı dünnää karşı kalktı.
Ofițial Tükiye bu barbarlık akțiyasında Şvețiya devlet kuvetlerini kabaatlı buldu. Türkiye prezidentın sözcüsü İbrahim KALIN kendi Twitter mikroblogunda yazdı, ani “Şvețiya devlet kuvetlerini islamofobiya hem iirincilik temelindä prestupleniyaların havezlendirmesini besleer… Ayozlu paalılıklara saldırılar serbestlik diil, ama modern barbarlıktır”.
Kendi Şvețiya devlet kuvetleri dä şindi boodayın adını diiştirer. Şvețiya premyer-ministrusu Ulf KRİSTERSSON Twitterda yazdı, ani “Koran”ın yakması – bu musulmannara saygısızlıktır”.
Şvețiya aşırı saacıların barbarlık aktına karşı olarak, Stambuldakı Şvețiya Başkonsuluun önündä Şvețiya bayraanı yaktılar hem Ankaradakı Şvețiya Büükelçiliin önündä protestlar geçer.
Источник anasozu.com 23.01.2023