Şafkın paası var nicä büüsün
Premyer energi kurumu danıştı Ȇnergetika uurunda agentstvosuna isteklen kaldırmaa paayı şafka 20 proţendä kirez (iyün) ayın birindän, o var nicä büüsün 2 leydän 17 bandän 2 ley 71 banä kadar kilovat saat için. Energetika uurunda agentstvosu kabledecek kararı beş günün içindä. Taa bir energiya uurunda kompaniyası danıştı bu agentstvoya ki zeedeletmää şavkın paasını. Laf gider Furnizare Energi Nord kurumu için. Onnar plana koydular üüseltmää paayı 2 leydän 51 bandan 2 leya 93 banä kadar. Bizim televizion gruppamız üürendi regionun yaşayannarından, nicä belli olacek onnarın bücetindä şavk paasının üüselmesi.
Şavka paanın enidän bakılması baalı onunnan, ani Moldova onu satın alȇr taa büük paaya. Çıkış olȇr o, ani kompaniyada toplandı büük borç satannarın önündä. Premyer Energi nasaat eder kurmaa eni paayı — 2 ley 40 ban. Energetika uurunda ȇkspert Sergey Tofilat açıkladı, ani bizim regionda Moldovada en ucuz paalar şavka, da bitki keret paa diişildi Baba marta ayında.
“Bu ay Moldova gres verer 59,9 biraz paalı hem energoatom verer 77 dollara. Satın almak paası zeedelendi yaraştırarak Baba marta ayınnan. Bundan kaarä büyer dollar da Baba marta ayından kirez ayınadan o üüseldi. Da bu faktorlar baalı şafkın paalanmasınnan”, — açıkladı Sergey Tofilat.
Regionun yaşayannarını şavk paasının üüselmesi sevindirmedi.
“Biz diiliz kayıl, hepsi benim hısınmarım. Neçin? Neyä sevinmää büünkü paalara bakarak. Bän düşünerim, ani bu diil dooru, kaldırdılar paaları petrol mallara, şavka, neylän kışın yısınacez bilmerim”.
“Kaldırerlar paayı şavka, ölä da zor. Bän ödärdim 250 ley şavk için, büün ödedim 600 ley. Nicä düşünersiniz, kazanç parası 3000 ley, varnicä mı kaldırmaa paayı?”
“Ölä da etmeer, hepsi gider ilaçlara, imek mallarına. Bilmerim. Biz bir ayda öderiz koşullar için bin ley. Pensiya da 2 bin ley”.
“Diil läzım kaldırmaa paayı şavka, zerä yok neylän ödemää, bizdä pek küçük pensiyä”.
“Diilim kayıl, zerä ölä da hepsi paalı, ko gözletsinnär içindeki politikayı, da sokulmasınnar başka işlerä”.
“Kazanç parası küçük, nesoy yaşamaa 2, 5 bin leyä? Bu diil dooru, bunu düşünmedään yapȇrlar. Onnar düşünmeerlär bizi, nekadar insan işlämeer”.
“Paalar hepsinä zeedelener, erlem şavka da kalkarsa, hepsi genä paalılanacek. Etişmer bişeyä para”.
Nicä nışannadı ȇnergetika uurunda ȇkspert Sergey Tofilat, bu getirecek paaların büümesinä başka lääzımnı işlerä da, da bu belli olacek insannarın harçlarında da.
“Halizdän belli olacek. Hepsi şindi paalılaner, bütün dünnedä. Biraz bu baalı ȇkonomikanın durumunnan COVID-19 sora, elektroenergiyayı satın alan çok var, ama satıcılar etiştirmeer, onun için paalar da zeedelener. Rusiyadan şavkı almȇȇrlar, alȇrlar başkasından da bu durum belli oler bizdä. Biz hepsini satın alȇrız”, — açıkladı ȇkspert.
Energetika uurunda agenstvosunda var beş gün, deyni almaa kararı şafkın paası için. Premyer Energi kompaniyası verer şafkı 920 yaşamak erlerin yaşayannarına devletin merkez hem üülen tarafında. Nışannayacez, ani gazın paası hep ölä kaldırıldı ondan sora, nicä “Moldovagaz” kurumu danıştı agenstvoya.
Источник grt.md 08.06.2022