Yardım etmää hazırmışlar. Halk Topluşunda GRT – ya finansları nicä arttırmaa soruşu baktılar
Gagauziay Halk Topluşu GRT Cümne Kompaniyasına hazır yardım etmää soruşlarda, angıları baalı finans, tehnika hem reklamasının hazırlamak bölümnerinnän. Bu önemli işlär için laf gitti GHT mas-media uurunda komisiyasının buluşmasında GRT CK temsilcilerinnän hem gözledici sovetin azalarınnan.
GHT mass-media, informaţiya politikasında hem insannarın hakları uurlarında komisiyasının oturuşunda 4 deputat pay aldı. Bu sayı etişti ki komisiyasının lääzımnı kvorumu olsun.
«GRT» CK ileri danıştıydı komisiyanın adına soruşlarlan, angıların kararlaması yardım edecek taa kaliteli uura kaldırmaa kompaniyanın işini. Laf gidärdi en ilk, ki kompaniyaya geeri çevirilsin haklar reklamayi hazırlamaa hem yayınnamaa. Bu vereceydi kolaylık büültmää GRT-nın büdjedını. GRT müdürün bir vakıda götüreni Yaroslav Bulgaru haberledi, ani taa birkaç yıl geeri bu takım karar vardı, ama kanonnar o zamandan beeri diiştilär.
Buluşmanın payalannarı bundan kaarä açıkladılar soruşu Gagauz dilinin kullanılmasının sferasının genişletmäk fondundan finans yardımın verilmesi için dä. GRT CK gözledici sovedin başı Mihail Vlah urguladı, ani laf gider türlü haberlerin hem programaların hazırlanılması için gagauz dilindä.
Taa bir problema, angısını baktırdılar deputatlar, baalıydı GRT – nın tehnika uurunda eniledilmesinnän. Bu lääzım ki işi taa kaliteli hem üüsek uura kaldırmaa, paylaştılar kompaniyanın öndercileri.
Komisiyanın azaları hepsi tekliflärlän kayıldılar, nışannayıp onnarın önemliini. Ama ki taa derindän olsun kolaylık bu soruşları baktırma hem bişey kararlamaa, lääzım derindän smeta dokumentaţiyasını kompaniyanın temsilcileri hazırlasınar, nışannadı mass-media uurunda komisiyasının başın bir vakıtlık götüreni Aleksandr Dülger.
Reklamanın da soruşunda komisiyanın azaları hep ölä kayıldılar yardım etmää kompaniyaya.
Soruşu baalı gagauz dilin ilerlenilmesinnän avtonomiyada hepsi deputatlar tutturdular. Bu iştä, sayerlar onnar, lääzım pay alsın nekadar taa çok kurum, girer orayi GRT da, angısı büün dä yapȇr büük işi ki gagauz dili ötsün hem ilerlesin.
Nezaman geçirlnecek komisiyanın ilerki oturuşu laflanacek biraz taa sora.
Источник grt.md
