Video: Masa tenisindä Gagauziya çempionatı topladı 100-dän zeedä sportçuyu avtonomiyadan
Gagauziyanın merkez kasabasında geçti masa tenisindä çempionat üç yaş kategoriyada çocuklar hem kızlar 18 yaşınadan hem taa büük. Yarışmaklarda pay aldılar regionun en kaavi sportsmenneri. Kim kazandı ilk erleri, hem nesoy uurda geçtilär yarışmaklar, Zinaida Kanţırın materialında.
Heryılkı çempionat masa tenisindä topladı Gagauziyadan yakın 100 sportçuyu bütün regiondan. Açılışta Gagauziyanın gençlik hem sport baknıın başı Sergey Stoyanoglo diledi uşaklara üüsek başarları, hem nışannadı, ani tenis nicä sport çeşiti ilerleer, bakannık ta buna yardım eder.
İki günün içindä Komrattakı gençlik merkezin hem “Fitland” sport kurumun zallarında tenis masalarında geçti kızgın setlär, herbiri savaşardı taramaa oyunda, ama diil hepsibaşarabildi. Pay alannarın laflarına görä, sportsmennär kaaviydilär hem becerikiydilär. Çoyuna sıra geldi koymaa bütün kuvedini, ki trenerin işi boşuna geçmesin.
“Bän pek mutluyum, ani burada toplandık, sevindim, ani genä buluştum dostlarımnan, özledim onnarın oyun stilini. Her yıl oynȇrım kendi dostlarımnan, da sınaştım onnara, burada sa diişildi nesa, taa ii oldu”.
“Söleyameycäm, ani burada profesional uurunda oynȇrlar, burada pek çok bu sportun sevenneri, da bu pek ii, zerä onnar alȇrlar eni becermekleri. Da ileri dooru olacȇk kaavi konkurenţıya”.
“Burada biraz serin, ama bütündän turnir ii. Çok insan var. Var becerikli hem diil pek becerikli sportçular”.
O gün kendi terbiedilennerinnnän yarışmaklarda pay aldılar onnarın trenerları da. Onnar nışannadılar çempionatın önemliini, çünkü burada var nicä görmää uşakların hazırlıını hem neylän taa läzım olacȇk işlemää.
NİKOLAY MELİNTİY, masa tenisında trener: “Toplandılar çok kaavi konkurent, onnarın taa çoyu Komrat hem Avdarma. Var kaavi uşaklar başka yaşamak erledän. Kim geldi hepsinin aadlarını bilemeerim, ama bilerim, ani onnar islää oynȇrlar”.
İVAN ȆKONOM, masa tenisında trener: “Kendi ustalıını bu gün gösterdilär bu sporun veterannarıda. Onnar büük havezlän geçirdilär partiyaları, brakıp gerdä taa yuufka konkurentları”.
“Konkurentlar kaavi, ama biz taa onnarı denämedik, şındı deneycȇz onnarın hem kendimizin kuvedimizi, hepsi taa ilerdä. Tarayacȇk kaavilär”.
Büük istemeklän hem kızgınnıklan kendi partiyalarını geçirdilär kızlar da. 15 spotçudan finala çıktı en kaavilär, angıları oldular Gagauziyanın çempionnarı.
“Bän beenerim, hepsini taradım da çıktım finala. Hepsi meraklı geçer. Ama pek aaz kız pay alȇr”.
“Büünkü gün geçti pek zor hem meraklı, ilk oyunu geçirdim ii. İkincidä biraz korku aldı”.
Trener Anna Melintiy nışannadı, ani yarışmaklar geçtilär üüsek uurda.
ANNA MELİNTİY, masa tenisında trener: “Hepsi bizim uşaklar oynȇrlar pek ii, bän mutluyum onnarın oyununnan, onnar göstererlär üüsek becermekleri masa tenisındä, hepsi koyulmuş davalar yapılȇrlar. Turnir geçer pek uslu, üüsek uurda hem hızlı”.
Hepsi taraycılar kablettilär ödül, diplom hem para baaşışlarını.
Источник grt.md 02.11.2021